|
هذا شعر عن الأحياء الشعبية
وبما إنكم مدفوع لكم اجر الإقامة وكل شيء من الإداريين
راح أدفع انا إقامتي حياكم جميعاً
( فتح خط ) لـ ( حي شعبي ) !!
أربعه / سته / وسبعه
فتح خط / ...
للمكان النائي المملي فضيله
( حي شعبي ) ومن يجي له
غير من يعرف (يلوك ) الحزن
بعيون القبيله ...
غير من يطعن بخاصرة المنازل
خنجر / الإيجار
ومقصلة / التنازل !!
رغم إن الحزن ( شعبي )
طوفتين ( بدون ) ( عازل )
آآآآه / ياحزنٍ تجرّع كل نبرات المنازل
آآآآه / ياذكرى إتساقط بأول اللي ( كان )
للـ / نسيان .../ لألوان الرحيل
لقافله ( تعزف ) تراتيل البُـكا
دمع ( ياما كان ) !!!
بنفس هذا الشارع الضيّق / زمان
عند ذاك البيت ( كنّا )
نِطعم ( الأبواب ) أنفاس ( النوافذ )
نصلب / الدلّه / على بئس النهايا
ونترك (الفنجال ) للفرض إيتوضى
من طُهر رحمّ الحكايا ..!!
كان فينا ( الهيل ) و ( البُن ) إيتشظى
( يندّه ) المدبر / ويدبر له ( هلا .. )
كان يشتمّ الخطاوي .../ وكل ماكثّرت / علا
يصرخ بـ أنف المكان ...
( حزن هذا الوقت دلّه ) و ( حزن هالدلّه شمالي ) !
( حزن هذا الوقت دلّه ) و ( حزن هالدلّه شمالي ) !
أربعه / سته / وسبعه ( فتح خط ) !!
لكل ( ترتيبٍ ) بترتيب/ أصدقايا
كلهم ..( راحوا ) وخلوني معايا
تقطر إفـ بالي ( تفاصيل ) الجدار
ذكري ( أبو ناصر ) و ( إعدام الحمار ) !!!
وأنكسر ( قطـ3ـــة ) ...
وينكسر بي .../ كل جار !!
ضحي في ( دمّه ) لجل تبقى الأبيّــه
كان يسهرها ... وهي دايم تنام
(صار له خمسين عام ) !!!
وهو يلاحظها مع غيره ( تخونه )
ورغم ذلك / ماينام !!!
ولما / بدّل / عامل الأيام في وجهه / سواده
وإنحنى ( قوسه ) ( وقار )
ألقت بـ كل إنتمائه ( خارج ) الأسوار !!!
وبعد (خمس سنين ) غُربه
قالوا ( الديره ) بـكُربّه
صاح / وبصوته (يزمجر ) كل نبرات الكهاله
( أبشري يادار في وقت الحرايب ..... نرخص الأعمار لجلك والثمين )
كان يلعب في ( فراش ) الموت ( عرضه ) !
كان ( يقطر ) داخل عيوني / عيون
( أدري إنه مايخون ) !!
( وربي إنه مايخون ) !!
( صار له خمسين عام )
كان يسهرها وهي دايم تنام
ولما تصحى .../ في صباح الخير
مع غيره .....( تخونه ) !!!
كان يدري / ...
وقدّ مايدري يحاول إنه دايم
............( ماينام ) !!!
إنه دايم ( ما ينام )
لين ( أسدل) ..... / في فراش الموت
غفوته......( الأخيرة ) !!!
|