[نبض الخيال]

اكره ما اكره الاسواق ..........
خاصه اذا صارت زحمه احس اذا صرت هناك بقعشريره وهم وخجل وضيقه وندم
واحيانا ودي اصيح واصرخ ......... ...
بس
بس
بس علشان اطلع من السوق اللي انا فيه
لكن الحمد لله دايم امسك نفسي وما اصرخ ولا اصيح
وطبعا هذا انجاز بحد ذاته .... 
واما عن قصتي في احد هالاسواق
فهي كالتالي ....
طبعا قصة اخوكم حصلت في سوق مغلق ومكيف يعني مثل السدحان للملابس
يعني حتى لو السوق مكيف تجيني نرفزه .. 
المهم انا من دخلت هالسوق انا واللي معي ؟؟؟ !!!
جتني الحاله اللي قلتلكم عنها في بداية الموضووع
اللي هي حاله القشعريره والضيقة ووووو و وو
واكيد بعد جتني الحالة الثانيه ....
اللي هي اني ودي اصيح واصرخ .....
الشاهد اني من دخلت الباب وانا ماسك امي واحن عليها
يمه نبي نرجع
همن اسكت شوي
يمه نبي نطلع
همن اسكت شوي
يمه ما خلصتي
همن اسكت شوي
يمه بيصكون
وعلى هالحاله كل شوي اقول لامي نبي نطلع وعلى هالحاله هي تطنشني 
ولكن بعد برهه من التسوق ضيعة امي
وهنا جلست ادورها وادورها وادورها وادورها
الــيـــــــــــــــــــــــــــــــــــ ــــــــــــــــــــــــــــــــــــــــ ـــــــــــــــــــــــــــــــــــــــن
ما لقيتها واستبشرت خيرا وفرحت كثيرا وابتسمت كثيرا و و و و .. 
وطبيعي اول ما جيت لمها اعدت لها شريطي المعروف يمه نبي نمشي
ولكن ......
الغريب الحين اني اقول لها يمه خلنا نمشي وهي ما تعطيني وجه مره يعني حتى ولا ترد علي
مره ساكته يعني ولا حرف ولا كلمة ترضيه تطنيش مصفى من الشوائب ……….
وهنا انا استغربت الوضع وبديت اقصر على المسجل
وشووي شوووي شغلت التيربو حق مخي و عرفت كل القصة
تدروون وش صار
اصبروا شوي باشرب مويه واعلمكم ....
صارت هالحرمه اللي لي ساعه الا كثير من الوقت وانا احن عليها بشريطي يمه خلنا نطلع مووب امي
وهنا تقلب وجهي وصار مثل الوان الطيف كل شوي بلون الحمد لله اللي ما احد دقق بوجهي ذاك اليوم
ولا كان حسبني حرباء من كثرت ما تقلب وجهي …. 
المهم ===<
بديت القي بالحلول وافكر وشلون اطلع من هالفشيله
سالم معافى من غير كف او بقس او رفسه او كعب او شنطه مليانه مكياج على راسي ...
وهنا خانني التفكير وطفاء التيربو وقضاء البنزين حق مخي لكنه طفاء على حل معروف ومحتم لكل
انسان ما يعرف يفكر مثلي
طيب وش هو الحل (( هذا هو السؤال اللي سالته مخي قبل ما يسحب علي ويتوقف عن التفكير ))
طيب وش هو الحل اللي طفىء عليه مخك .. !!
قالي مخي انسحب بهدووووووووء وســــكـــيــــنــــه وانشاء الله ما يجيك شيء
طيب يا مخي هذا حل عادي ولازم يصير لاني ما راح اقعد هنا طول
عمري فيا مخي ممكن تدور لي حل ثاني افضل ....
وبكل برود قالي مخي للاسف لا .. ؟؟ !!
قلت طيب .
والله واقوم وانسحب
بهدوووووء وســـكــــيــــنــــه علشان انشاء الله ما يجيني شيء
وهنا ..... وفي هذع اللحظه ...المميته ....
جتني المفاجاة العظمى ............... اللي زادة التراب بلة ... (( هي كذا ولا انا غلطان ))
طيب وشيء المفاجاة
المفاجاه اني لقيت واحد وراي يبتسم بلطف مدري بخبث مدري بشيء ثاني ....
المهم اني ما عرفت اتهجاء تعابير وجهه ..
وهنا طبت الروعه صارووخ وسط قلبي وتجولت في كل عروقي وشراييني
ما خلت شيء الا وتجولت فيه داخل احشائي ..
وطبعا الروعه ما جت لحالها جابت معها ناس تدرون من جابت ... ؟؟؟
جابت معها الخجل والنفافيض (( الرعشه )) والخوف والارتباك والتبليم ومجموعه طيبه من هالاشكال
وهنا انا ظمنت اني اقل شيء بيجيني كف يعني على الاقل
وبديت اسرع من انسحابي وانا اترقب الكف
وشوي شوي شوي
شوي شوي شوي
ابتعدت عنهم واختفيت ورى الملابس
والحمد لله ما جاني ولا كف
وهنا انا تساءلت ليه الرجال ما سوالي شيء
ليه ما سطرني او صفقني او على الاقل شاتني شلوتي وطيرني خمس متر ونص ....
فاستنتجت عدة استنتاجات عظيمه ... (( تكتب بماء الذهب ))
وقلت ==== <
يمكن حس اني بريء واني ماني من هواة المغازله و تنطيل الارقام
ويمكن انه يحسبني مريض او فيني شيء ما هو بالعالم ..
ويمكن خاف مني لا ني ضخم البنيه عظيم المنكبين
ويمكن انه احسن الظن فيني وقال ان الرجال غلطان ومعذور
ويمكن انه طقني بس انا ما حسيت لغرقي في التفكير العميق
ويمكن انه خاف مني وقال في نفسه ماله داعي اتصفق قدام حرمتي ..
ويمكن انه شافني وقتها بزر كبر اصغر واحد من عياله فقال الله يهديه
وهو الارجح باذن الله والسلام عليكم ورحمة الله ...
والله يسلمك ياللي تقول لي الحمد لله على السلامه
واخيرا
اتمنى ان تنال قصتي على اعجابكم ولا تخلونا من انتقاداتكم فمنكم نستفيد .... .... 
يعني لو القصة ممله قلي ترى القصة ممله عادي ما راح ازعل بس يمكن اتنرفز ..
ولو ان القصة با يخه قلي با يخه وما عندي أي مشكله بس يمكن ادعي عليك
ولو ان القصة طويله قلي علشان احاول اقصر من قصصي في الايام الخوالي
قصدي الايام القادمه بمعنى اخر اعطيكم المختصر
والسلام عليكم رحمه وبركاته
اخوكم نبض الخيال
مع خالص شكري وتقديري لكل من قراء قصتي ........ 
وحبي ودعائي وشكري وتقديري وثنائي لمن رد علي او انتقدني ...