بديت بخالقي

[محمد الخليفي122]

الاخوة الاعضاء وزوار منتديات شبوة اسمحولي ان انقل لكم هذة القصيدة وهي بعنوان ( بديت بخالقي ) للشاعر /عبداللة بن علوش وهي في مدح قبيلتة بني هاجر وفيها يمتدح الشاعر بعض صفات ربعة وقبيلتة ويذكر منها الكرم والشجاعة والنخوة وهذة الصفات التى يتحلابها القبائل العربية وشعوبها ،ولا اطيل عليكم
بديت بخالقي

باسم المعتلي جلّ جلاله ** وصلى الله على محمد وآله

لعل الله يغفر لي ذنوبي ** أسال الله وغيره ما اساله

اسال اللي فتح بيبان عفوه ** عقب ماتاب عبده والتجاله

وعن شين الكلام اعز نفسي ** واقود الفكر لبيوت الجزاله

واسوي لي بيوتٍ منتقيها ** اسويها على هيئة رساله

انصيها بني هاجر جميعا ** بني هاجر بلا استتثناء حاله

ولابي شي منهم غير ودي ** اعد الطيب واجدد وصاله

كريمٍ في معانيها وكني ** بخيلٍ ما يفرّط في رياله

الى مني كتبت البيت الاول ** يجيني البيت الآخر في سهاله

والا مني كتبته جاء تبيعه ** وقامت تنطوي طوي المحاله

وانا لا من كتبت البيت اصونه ** ولا ناقد يجيني من خلاله

وقدام الجماهير الغفيره ** على كل البيوت اعطي كفاله

عليها ختم إبن علوش يعني ** علامة جوده وفحص الوكاله

ثمنها قولةٍ وش قلت فيها ** ولحدٍ قال قلها قلتهاله

سببها ماقريته في الجريده ** يقول ان الفخر سخف وخباله

تعمق في الصحافه جعله اتلى ** كتبله زاويه والا مقاله

ضعيفٍ مادرى ان المدح كايد ** ولا حاشه يكون اللي سعاله

ابمدح ربعي طوال اليماني ** واعده كل ماوافق مجاله

يابوك الهاجري لامن مدحته ** تجي فيه انتفاضه واحتفاله

ولامنك مدحته وانت صادق ** نطل بشته ولا خلى اعقاله

خلقنا الله لاهل الطيب قدوه ** وكل سنافيٍ حنا مثاله

بعضنا لو تغدى ماتعشى ** ومستانس ومتنومس وداله

يوضع كسرة العود الكبيره ** على المدخن الى زان اشتعاله

يطيّبهم عقب جنب السمينه ** والى من راح ضيفٍ جا بداله

يرص الدين فوق الدين الاول ** الين يسد دينه من حلاله

مخاسيره خوافيها على الله ** رصيده في المراجل راس ماله

سلام الله علينا يا الهواجر ** سلامٍ نستحقّه ونعناله

فحنّا اللي نكرّم من نصانا ** يمينه في الشحم عقب الفواله

وحنّا اللي صداقتنا نقيّه ** بميل الوقت والا بعتداله

وحنا اللي روابعنا قويه ** ضعيف الرابعه نرفى خماله

وحنا اللي نقدّر كل حاكم ** لاعاهدناه نوفي عهدناله

وحنا هقاوينا كبيره ** وحنا اللي تبين إبنا الجماله

وحنا اللي نبيّن فالشدايد ** الى من الزمن شانت لياله

وحنا اللي حميّانا سريعه ** ومن حنا سناده طاب فاله

جمال حمول في كل اللوازم ** حدانا لابرك للحمل شاله

مسمينا موّحد ذا الجزيره ** مليكٍ مايشكك في مقاله

لسم * خزنة ظفر * والأسم منّه ** وحنا كفو لسمه واحتماله

صدق عبد العزيز الله يبيحه ** عسا الغفران والجنّه مآله

ولا علمٍ يجي من تحت حيده ** لنا فعل وتواريخ ودلاله

لنا في جولة الأيام جوله ** زمانٍ فات جعله في قباله

ولو حنّا شويٍ ماعلينا ** زهمنآ الجد الأول من جباله

يجي قحطان في لازم عبيده ** وترقى له عبيده وتحماله

الي من ثار دخان الشنيعه ** معادينا رقاده ماهناله

وناخذ صولةٍٍ في من نوينا ** وياخذ صولةٍٍ في من نواله

وتصبح عاصفة صحراّ صحيحه ** كفانا الله من شر الجهاله

ولا نطغى الي منّا قدرنا ** نخاف الله والدين إنحماله

وعقب الله والدين الكرامه ** تنزهنا عن دروب النذاله

عطانا الله من مدّه وجوده ** رقابٍ ماحنيناها سوا له

عوايدنا القديمه والجديده ** اصاله مستمدّه من اصاله

وكلٍ فيه من الأجواد حقّه ** جنوبي نجد وبنجد وشماله

وقد حنا بعصرٍ فيه نعمه ** عسى الشيطان يبطي في حباله

بفضل الله ثم سنّة نبيّه ** ودينٍ مادعانا للضلاله

وفي خير الخليج الله يديمه ** نعيمٍ كلّبونا في ضلاله

ركون العز في الست العواصم ** سلاله تنحدر منها سلاله

ولاودّي أطول في مقالٍ ** تكفينا قصاره عن طواله

نهايتها ومضمون ثمرتها ** يذم المدح رجلٍ مايناله

وأقول أن المراجل ماتكمّل ** لا راح العود ياتونك عياله

سلام الله علينا يالهواجر ** سلامٍ نستحقّه ونعناله

الشاعر\عبد الله ابن علوش

[الصالحي5]

مشكور اخي الخليفي 122على

هذه الكلامات ومنتضرين المزيد

[أبـــو الـــونـــآآآت]

مشكوووووووووور اخي محمد على هذا النقل الرائع

وننتظر جديدك

تحياتي

[محمد الخليفي122]

اقتباس من مشاركة الصالحي5

مشكور اخي الخليفي 122على

هذه الكلامات ومنتضرين المزيد

اسعدني مرورررك وتقبل تحياتي

[محمد الخليفي122]

اقتباس من مشاركة الخليفي نمبر1

مشكوووووووووور اخي محمد على هذا النقل الرائع

وننتظر جديدك

تحياتي

هلا وغلا بنمبر 1واسعدني مروررررك وتقبل تحياتي

[الظاهر بيبرس]

مشكور اخي محمد على النقل المميز
تحياتي لك/بيبرس