مسرحيه اخر نفس

[seha_alex]

السلام عليكم ورحمه الله و بركاته
ازيك يا شباب النهارده معانا مسرحيه من العيار التقيل و هيه مسرحيه اشترك فى كتابتها 5 اشخاص من التحفجيه و دى نتاج شغل 3 سنين من الكفاح و العمل
ملحوظه * المسرحيه مسجله فى المصنفات فى مصر
2_خاصه بفريق التحفجيه
3_تم عرضها يوم 19 يوليو لعام 2007 غلى مسرح الابداع بالاسكندريه
اخر نفس
الشخصيات :
1_عرفه :شاب يتيم ,يصبح هوه الاداه التابعه للشيطان برغبته فى الانتقام
2_سعيد :رمز الانحراف فى الشله و هوه شاب مستقل عن اهله تماما
3_خليل :ملتزم و نظهر فيه صفات السذاجه و التقليد
4_دينا :فتاه متحرره نتيجه التشدد الاسرى
5_هند :فتاه ريفيه تسعى الى تقليد المدنيه المتمثله عندها فى _دينا_
6_سكره :صديق _سعيد _ المقرب
7_وليد :شاب تتعرف عليه _هند_ فى الكليه
8_الشيطان :غنى عن التعريف طبعا
__________________

[seha_alex]

يفتح الستار في المشهد الأول على عرفه جالسا موليا ظهره للجمهور ، يدخل رجل إلي المسرح من سلالم دخول المتفرجين الجانبية ، يقف على رأس السلم و يبدأ في فتح باب وهمي مستخدما مفتاحا يخرجه من جيبه ، يبدوا بعد عنت أن الباب قد إنفتح ، يدخل إلي المسرح بخطوات غير مبالية ، ثم ينتبه فجأة إلي وجود الجمهور .


الشمروخ : يا ساتر! ( ينظر إلى الحاضربن بتعجب ): إيه ده انتوا هنا ؟ ( تحين منه التفاتة إلى عرفه الجالس على المسرح ) : آه ، جايين عشان تتفرجوا عليه ( يصمت ) : بس غريبه! انتوا عارفين انتوا جايين تتفرجوا على إيه؟ ، ولا انتوا اخوات المخرج و جايين تعملوا الواجب؟ ما هو مش معقول تكونوا دافعين فلوس عشان تشوفوا الغم ده يعني؟ ( يقف بين المسرح و الجمهور) ، متأسف يا جماعه غلطت في العنوان ، ده مسرح الحكومة و انتوا معدومي الدخل ، الدخول مجانا بعد ملء الاستمارة طبعا، الاسم : مواطن مصري كامل الأهلية ، السن : بعد طرح الحوادث القدريه و المبيدات الآدمية و بعد طرح البهدلة و حرق الدم ( ينظر بذهول إلي الناس ) ياللا ، الأعمار بيد الله ، النوع : غير معروف و على وشك الانقرض، سبب الزيارة ( يمسك بورقة و قلم وهميين و يدون) ، المسرح مكيف الهواء ، أي تعليقات أخري ( يصمت مفكرا )، يا سلام مفيش أكتر من الشكاوي و التعليقات ، خد عندك ، نرجوا إطالة مدة العرض ( يحدث نفسه) : حتي الواحد يعرف ينام براحته ، ثانيا ، إضافة حفالت سواريه لحل مشكلة الإسكان ، و تكون مدة الحفلات من الساعة العاشرة ( عشان العيال يناموا بدري ) حتي الساعة السابعة صباحا ( يدوب الناس تروح تكمل نوم في الشغل) ، ثالثا ، صرف تعيين يومي من اللب و السجاير للمواطنين فوق ال18 سنه ، مع السماح للمواطنين تحت السن بلم القشر و السبارس ، رابعا ، عايزين نضحك ، نضحك ، (يصعد إلى المسرح و يلكز عرفه في كتفه فلا يعيره أي انتباه ) ، عايزين نضحك يا جدع ( يوجه الكلام لعرفه ) ، ده حتى مش مستعني يبصلي ، مصدرلي الطرشه.

( يغير نبرة صوته) ، و لا يمكن يكون مننا ، معذور ازاي هيضحك و يرقص و يتلوي و هو موجوع ، ولا ممكن ، في ناس بترقص من السعاده و ناس بتتلوى و ترقص من الوجع ، خلاص اعملوا اللي انتوا عايزينه ، اتفرجوا ، ناموا ، اضحكوا عليهم أو حتى علي نفسكوا ، لا الكون بتاعكوا ولا الحياه ملككم.

( يتجه إلى نفس المكان الذي دخل منه يفتح نفس الباب الوهمي ، يبدوا و هو يخرج و كأنما صدم حافة الباب ،( يقول متوجعا) : خامسا ، يعلوا الباب ده شويه!

[seha_alex]

--------------------------------------------------------------------------------




المشهد الاول L J
المنظر: غرفة مهملة, عليها السجائر وأوراق اللعب و بعض الزجاجاتالفارغة على الارض, (عرفة) فى وضع كئيب, نصف جالس على الارض


يمسك سجارة مطفاءة فى يده, و يحدث نفسه.

عرفه (لنفسه): و آخرتها معاك يا عرفه, انت ناوى تعمل ايه مع الناس دى؟... ولا أنت عارف تعيش معاهم ولا هما عارفين يعيشوا معاك.
(يصرخ) خلاص...كفاية... زهقت.....(يقف مترنحا) زهقت من صنف البنى آدمين ده...(يكلم الجمهور).

تصدقوا, عمرى ما أتكلمت مع بنى آدم أكتر من ربع ساعة على بعضها
(يضحك بشكل هستيرى)... عارفين العيال كانوا مسمينى آيه فى اعدادى, كانوا مسمينى أفيونة, آه و الله العظيم كانوا مسمينى افيونة(بجدية), فى الثانوى بقى كانوا مسمينى(يقطع فى كلامه مشيرا بسبابته): بس ده كلام بينى و بينكوا يعنى ما يطلعش, كانوا مسمينى(يقطع كلامه تانى), لا مش هأقول انتوا حتفتنوا, (يضحك و يضيف): و بعدين فى حريم قاعده معانا ميصحش, (يستطرد) قصره, قالوا لى لما تدخل الجامعه بكره عقدتك تنفك و ياما زيى دخل الجامعة و بقى بربند, طب بذمتكوا فى احسن من كلية الحقوق علشان لسانى ينفك؟ و الله تلات سنين أخرس, ما هو المثل بيقول خدوهم فقرا تشحتوا سوا, حط العرجة على المكسورة حتعمل آيه يعنى؟

الاكادة بقى ان السيد الوالد لما ستى- والله هيه العاقلة فى العيلة دى
سألته الواد يدخل الحقوق يعمل أيه؟ قام قالها: اسم النبى حارسه حيطلع وكيل نيابة ( يضحك ساخرا ثم يلتفت الى كتاب على الارض على غلافه صورة الزعيم مصطفى كامل و يساله): و لا إيه رايك انت يا عم الزعيم ما انت محامى برضه, تقدر تقولى أدخل الحقوق ليه؟ هه؟ ما بتردش ليه؟ (ممسك الكتاب فى يده), تكونش عايزنى أقول زيك, " من أجل معرفة حقوق الافراد و الامم" ( يطيح بيده مصدرا صوتا بفمه يعبر عن الاحتقار)

-
طز... كداب فى اصل وشك, انت دخلتها علشان ما جبتش مجموع فى الثانوية العامة. (يلقى الكتاب و يعود للضحك الهستيرى),(يستطرد):
و بعدين كل ده كوم و موضوع الحريم ده كوم تانى, عارف العيل من دول اما يحب يبلف البنت اللى معاه لما تسأله عن اللى عرفهم قبلها, يجى بسلامته قايلها واحده بس, تقوله مين , يقولها أمى,(يضحك بمرارة):

عارفين حتى دى معرفتهاش, سلمت نمر و هى بتولدنى (يشير الى جسده النحيل ساخرا): قال يعنى جابت الاملة.
و بعد الارف ده كله تلاقى نفسك متعلق من عرقوبك لا انتش ضامن جنة و لا نار, طب و الله أنا أوقات بحسد الحرامية و النصابين و الجماعه أياهم, أهم على الاقل عارفين سكتهم و واخدين خط القاهرة جهنم بس الخط ده مش طوالى كده, مرة ياخد ترانزيت في باريس, فى لندن, في سويسرا (يضحك), لكن اللى زيى لو خد خط جهنم حيعمل ترانزيت فين؟
في أبوتيج و لا كفر البلاص ولا في زودياك في عرض البحر رايح ايطاليا أو اليونان... و اهى في الاخر نار.

(يظهر الشيطان على طرف المسرح في صورة رجل أنيق يرتدى حلة سوداء كاملة و قميص أبيض... يخرج قداحة و يشعل السيجارة لعرفة.

الشيطان: ولع, ولع, يا بني علي رأيك ما هى كده كده نار.

عرفة: تعبت و الله و الدنيا دوختني معاها, مش قادر بقى أتظاهر بأني عايش أكتر من كده, أنا عايش (يخبط رأسه بكفيه) مش عايش, مش عايش

الشيطان(في تعجب): عايش و مش عايش...حاجة غريبة (في سره) الله يجازيك يا عمرو دياب حتبوظلنا الشغل.(يقترب من أذن عرفة): أنا أول مرة أشوف حد عايش و مش عايش يا بني, هي حاجة من أتنين يا أما عايش يا أما مش عايش و ما دمت مش عايش...

(يتظر ألى السقف فينزل منه حبل علي شكل المشنقة و تتحول الاضاءة الى اللون الاحمر)...

(يغلق الستار و عرفة ينظر الي الحبل بذهول).

[seha_alex]

--------------------------------------------------------------------------------




المشهد الثاني Lj


المنظر (المسرح خال الا من منضدة موضوعة في المنتصف عليها جثة مغطاة بغطاء أبيض ، اضاءة المسرح زرقاء اللون– يمكن الاستعانة بممثل آخر لكي يمثل دور الجثة أو استعمال أي خدعة أخري – الضوء مسلط على الجثة لفترة وجيزة ).
عرفه يدخل الي الغرفة من الجانب و هو يرتدي ملابس بيضاء يرفل فيها ، ينظر الي نفسه باستغراب و ينظر للجثة علي المنضدة ، يحوم حول الجثة قليلا ثم يعطي ظهره للجمهور و يتجاسر ليرفع الغطاء عن وجه الجثة ، يعيده سريعا و ينظر حوله بقلق ، في هذة الأثناء يدخل الشيطان في وجهه الحقيقي و لكن بنفس الملابس التى ظهر بها من قبل.
عرفه : ( بفزع) انت مين؟
الشيطان: ايه يا عرفه مالك؟
عرفه : انا أعرفك؟
الشيطان: عز المعرفه ، بس انت دقق.
:( عرفة يتذكره) أيوه مش انت اللي جتلي قبل ما..........
: أيوة ، عليك نور يا حبيبي .
: و ايه اللي جابك تاني ، و ايه المكان ده؟
: طب بس بالراحه ، المكان ده يا سيدي اسمه المشرحه.
: مشرحه!
: أيوه مشرحه ،( يشير الي الجثة ) : جثه و مشرحه.
: بس انت مجاوبتش على سؤالي ، انت هنا ليه؟
: عيب يا عرفه تسألني سؤال زي ده ؟
: ليه؟
: سؤال جديد ده؟( يضحك) ، أنا هاريحك و أجاوبك ، يا عرفة أنا هنا عشان نكمل اللي بدأناه.
: بداناه! أنا شايف ان الموضوع انتهىخلاص( يشير الى الجثة).
: ساذج ! بس افتكر ان أنا جتلك لحد عندك مرتين ( يستدير لكي يرحل).
: استنى بس ، انت رايح فين؟
( يستدير له الشيطان برأسه و يتوقف عن المشي ، فيطرق عرفه منهزما)
:( يكمل) أنا لسه عندي أسئله.
: و أنا عندي الاجابات، لكن بشرط.
: لازم كل حاجه بشروط ، مفيش حاجه من غير مقابل.
: (يضحك) ، المهم ان المقابل يكون أقل من الفايدة اللي انت هتاخدها ، كده تبقي كسبان ، و بعدين يا عم متكبرش الموضوع ده شرط بسيط أوي.
: و يبقى ايه الشرط ده؟
: تسمع ! تسمع كويس كل كلمة باقولهالك و تفكر فيها من غير ما تصدق أي حاجه حد يقولهالك عني، و تعتمد علي احساسك بس.
: بس دول شرطين!
: مش بالظبط ، المهم موافق؟
: أيوه موافق.
: تمام ، دلوقتي انت عليك انك تسأل و أنا علي اني أجاوب.
: أول حاجه أنا عايز أعرف ايه اللي جابني .. أقصد جاب جثتي هنا؟
: و هوه ده سؤال ، جثة من حاله انتحار و محدش جه يستدل عليها أو يستلمها ، طبعا لازم تروح المشرحه.
: و بعد كده هتروح فين؟
: حاجه من انتين ، اما انها هاتدفن في مقابر الصدقه ، لكن ده غالبا مش هيحصل...
: ( عرفه مقاطعا ) امال هيحصل ايه؟
: ( يتظاهر بالأسف) ، هتفضل في المشرحه ، زي ما أنت عارف الطلبه بتوع الطب بيحتاجوها في الدراسه المهم بس انك تفلت منهم.
: مين دول؟
: جماعة و العياذ بالله واخدينها تجارة ( يستدير اليه و يهز رأسه )، دول بيبوعها قطاعي دلوقتي.
: يعني مش هاستريح حي و لا ميت؟
: انت بايدك انك تريح نفسك.
: و انا ف ايدي ايه أعمله عشان أغير الوضع ده؟
: أنا باقولك تستريح من اللي انت فيه مش تغير الوضع.
: و ايه الفرق؟
: الفرق انك ممكن تشفي نارك من اللي وصلوك للوضع ده و كده أظن انك هتكون مرتاح أكتر.
: و دول أجيبهم ازاي؟
: انت أكيد عارفهم أكترمن أي حد تاني.
: عد بقي للصبح ، أنا كده مش هاخلص!
: بس أكيد في ناس أهم من ناس ، أسماء علي رأس القايمة.
: ( مفكرا) أكيد.
: خلاص عليك بيهم( يستعد للرحيل و لكن عرفه يستوقفه)،
: طب مش تفهمني ازاي؟
: يا أخي انت مش صغير ، فكر.
: طب بس كده حطني ع الخط.
: ماشي يا سيدي و لو اني مابحبش التفصيل الصغيرة دي.
( يضع ذراعه على كتف عرفه ، يمشيان)
الشيطان: احكيلي انت الحكاية و أنا هاقولك تعمل ايه بالظبط.
يغلق الستار...

[seha_alex]

بعد أن يغلق الستار ، يسمع في الداخل جلبة يعقبها خروج الشمروخ من بين الستائر جاريا و هو فى ملابس الشيطان الواسعة عليه مرتداه كيفما أتفق و بشكل غير مهندم على الإطلاق ، ينزل سلم المسرح و هو يضحك بهستيريا.
( صوت من الداخل ) : انت فين يا حيوان؟
( يستدير الشمروخ إلى المسرح و يرد ) : راجل ، تعالى خدهم مني ، هأ ، و عامللي فيها شيطان يابو قرنين!
( يجلس على السلم الخاص بخشبة المسرح و يكلم الجمهور )
: بقى ده منظر شيطان ، ها ، بالذمه ده ينفع ....ها ، يا عم ده ولا الشيطان اللي كان بيطلع أيام أبو جهل ، أحمر و بقرون و يمكن بديل كمان! العالم دي شكلها لسه ما شافتش شياطين و لا إيه يا سيدنا ، ما يعرفوش كانوا سألوا حد شاف ، يسألوني و أنا أقولهم ع الشياطين ، ياسلام الشيطان منه دول تلاقيه اليومين دول قيمة و سيما كده يقعد مرحرح و آخر تمام و العالم بين يديك و الدنيا قرية زغننة بفضل الانترنت و خلافه ، و بدوسه واحده على زرار ممكنم يخرب مالطه ولا يشغلش نفسه بالمسائل التافهة دي ، السكرتيرة على يمينه و دفتر الشيكات على يساره ، و اليافطه الخشب وراه عليها " هذا من فضل ربي " بالبنط العريض ،( يصعد السلم أثناء حديثه و يقف أما فتحة الستائر ) ، أهي دي الشياطين ولا بلاش ، مش الهجايص اللي عاملينها دي ، بلا خيبه ( يضحك ) ، دا حتي الشراب اللي كان لابسه مقطوع ( يشير إلي الجورب الخاص بالشيطان في قدمه ) .

أثناء هذا تمتد يد من بين الستائر و تجذبه إلى الداخل ، يعلو صوت صراخه ثم يغيب.

[seha_alex]

--------------------------------------------------------------------------------




المشهد الثالث Lj
المنظر: ديكور الكافيه يجلس فيه الاصدقاء الثلاثة سعيد, هند, خليل,أمامهم بعض الاكواب الفارغة و زجاجات المشروبات, يدور الحديث حول عرفة و انتحاره.
تدخل دينا تلقي بحقيبتها علي المنضده و تجلس مرتمية و متأففة من الحر و التعب و مهوية بيديها علي وجهها محاولة تحريرها من خنقة التحجيبة.
دينا: أف... هاي يا جماعة, متتصوروش موضوع عرفة ده قالب الكلية إزاي.
سعيد: (بعد أن يأخذ نفس و هو ينظر للدخان) علي أيه يعني مثل مع محمد
سعد ؟!
خليل: يا أبني أنت مش مستوعب, ده قتل نفسه.
(دينا تبحث في الزجاجات عن قطرة متبقية ترطب بها جوفها)
سعيد: مش غريبة برده, الواد كل يوم كان أنيل من اللي قبله, ده أنا نفسي كنت
ساعات بحس إنه مات و بيشتغلنا...
خليل: أنا مش متصور أن في بني آدم ممكن يعمل في نفسه كده.
هند: هوة اللي وصل نفسه لكده.
سعيد: ياما فهمته إزاي يشيل دماغه من الأرف ده كله و يحلقلها, بس هوه اللي
مفيش منه رجا.
دينا: علي كده ممكن مايكونش قتل نفسه (و هي تضع الزجاجة فارغة علي
المنضده, ينظر إليها الجميع).
خليل: إمال حد قتله؟
دينا (بأداء تمثيلي لتثير الرعب بشكل ظريف): لأ .... دفنوه حي....
(تشرع في الضحك). (يبتسم الجميع).
هند: طب ممكن بلاش السيرة دية لحسن بخاف.
دينا (ساخرة): يا بنتي هوة ده كان يخوف حي علشان يخوف ميت...
(تضحك دينا و سعيد, يظهر عرفة فجأة علي جانب الاخر من المسرح يسلط عليه الضوء).
خليل (يندهم): يا جماعة أنتوا أزاى قادرين تتكلموا كده.
هند: أنا لحد دلوقتي مش قادرة أصدق أنه أنتحر.
(عرفة يتحدث لكنهم لا يسمعونه كأنه يكلم نفسه رغم إنه يرد عليهم).
عرفة: أنا ما أنتحرتش... أنا أتقتلت...
دينا: لا صدقي يا أختي .
سعيد: يا أخونا ده كان سيكو سيكو (تضحك دينا معه ثانية).
عرفة: أنت اللي مجنون أنت و أهلك.
دينا: يا لهوي عليه و هو مزرر القميص لحد مناخيره.
عرفة: أخرسي يا واطيه.
هند: يا ساتر عليكي (و هي تضحك).
عرفة: كدابين, مش عايز شفقة من حد.
خليل: يا جماعة كفاية بقي حرام عليكوا كدة.
عرفة: تقتلوا القتيل و تمشوا في جنازته.
سعيد: خلاص بقي فككوا من السيرة دي و شوفوا بقي عايزين تروحوا فين
النهارده....
دينا (تلم الورق من علي المنضده): أنا شايفة في كتشينة, نلعب بولة و نشوف
حنعمل إيه .
(في لحظة قبل أن يدخل الشيطان يأتي تليفون لسعيد فيجيب علي جواله)
سعيد: أيوه يا سكره... إيه يا بني ما جتش ليه... يا دي النسوان...أنا حستناك.
(يعود للمنضدة يأخذ دوره).
عرفة (نافرا و هو ينظر إليهم بغل): عمر ما العبة دي حتنتهى أبدا....
صبركم عليا....
(يدوى صوت الشيطان)...
الشيطان: شاطر يا عرفة بقيت فيلسوف, بس إحنا ما إتفقناش علي كده.
عرفة: بس.............
الشيطان: ما تبسبسش, لازم تكون هادي و مركز علشان تلعب صح...فاهم,
هادي و مركز... يالا لم الورق علشان تلعب.
(ينصت عرفة للحظة ثم تلتمع عيناه و يتجه نحو منضدة اللعب, يجمع الاوراق
الملقاه علي المنضده, فيلتفت له الجميع في ذهول, يجلس في برود، يضع أول ورقه أمام هند ويبتسم أبتسامة خفيفة ماكرة).

تغلق الستار........