تفجير لم انساه... قصة حياتي

[احلى_عراقي]

اريد اعرف التفجيرات والمفخخات والارهابيين يعوفونة بحالنا
شباب اني اليوم راح احجيلكم عن تفجيرات الكرادة وعن الخسائر وعن الضحايا اللي سقطت بسبب التفجيرات
.
في بداية يوم الخميس المصادف25/1/2007 اجتي اخبارية لاهل الكرادة بوجود ثلاث سيارات مفخخة الكل جانوا خايفين بذاك اليوم والكل يراقب السيارات اذا كانت مشبوهة واي سيارة يشكون بيهة يفتشوهة لكن ...
في بداية غروب الشمس عن الكرادة حوالي الساعة الرابعة والنص في الوقت الذي تكون فيه منطقة الكرادة مزدحمة انفجرت سيارة مفخخة من نوع (كوستر) محملة بثلاثين قنينة غاز واكثر من عشرة صواريخ وحوالي نصف طن من الكبريت .
بالقرب من (شارع الاورزدي)
انتوا هسة تخيلوا المشهد وفكروا بعدد الضحايا بهاذه المنطقة وهي عبارة عن سوق شعبي
الحقيقة اني جنت بعد اربع شوارع عن الانفجار المنطقة اللي اني بيهة كنت زاير قرايبي ما اعرف الجام والكزاز منين يجي علية .
بعد دقيقتين من الانفجار اهالي الكرادة ركضوا الى منطقة الحادث وكاموا يشيلون بالجثث.
اللي عندة سيارة يشيل جثث ويودي للمستشفى واني وابن خالتي جنة قريبين من الانفجار ورحنة شلنة الجثث وصعدناهة بالسيارات وشكد ما اوصفلكم صورة المنظر انتوا مراح تستوعبوا لان يعني اكثر من اربعين شهيد و100 جريح سقطوا حتى سيارات الشرطة والحرس الوطني يشيلون بسياراتهم .
اني قلت اعوال خالتي مضر ومصطفى راحوا بالانفجار لان اني قبل شوية من الانفجار شفتهم رايحين باتجاه الانفجار بس شفتهم ويانة ديساعدونة بحمل الجثث .
وبعد تقريبا ساعة من الانفجار خلصنة حمل الجثث وبدينا نغسل الدم ونشيل قطع اللحم واجزاء اجسام الضحايا الباقية .
واجة واحد من بعيد يصيح لكوا السيارة الثانية على بعد تقريبا سبعة او ثمن شوارع عن السيارة الاولى وجان صاحبها الارهابي (سوداني الجنسية) وكان مكبسل .حسب مصادر الشرطه
بعد موصلوا القوات الامنية للسيارة كالوا احنة منكدر نفكك السيارة ولازم نفجرها وهي نفس مواصفات السيارة الاولى ونفس كمية المتفجرات بيهة وبعدين احنة الموجودين بالمنطقة رحنة على البيوت القريبة وكلنالهم ان يفتحوا الشبابيك وان يبتعدون عنها لان راح نفجر السيارة الثانية والمحلات كلهة عزلت وبعد ساعة ونص الكل راحوا ومبقى اي احد بالشارع فجروا السيارة الثانية لكن الحمد لله ماكوا اي خسائر بالارواح لكن...
جانت الخسائر هالمرة مادية يعني...
مجمع (الليث التجاري) تفلش.!
والمحلات اللي يمة كلهة وكعت . وهذا كل اللي صار بهذا اليوم الحزين على اهالي الكرادة .
والله يستر من السيارة الثالثة.

والضحايا اللي نعرفهم شخصيا همة:-
1. ثنين من اصدقاء اعيال خالتي استشهدوا
2. ثنين من اقاربي جايين يشفونا خصيصا لانه كنا متغربيين من 17 بالاردن تصوبو
3. ابن عم خالتي تصوب بالمستشفى مغمى عليه
4. صديقه خالتي استشهد وهي كانت تتبضع
والخسائر المادية:-
1. محل زوج خالتي تفلش
2. محل ابن جيران خالتي بي اضرار
وانشاء الله تخلص التفجيرات بالعراق ونخلص من الارهاب.
أخوكم عراقي ابو الغيرهـ
شاهد عيان بما راه بعيونه وانا شاهد بما اقول.....
كنا في دار خالتي في زياره مستعجله مع خالي نحن الاثنين فقط كنا في الاردن ذهبنا زياره مصيريه لتفقد الاهل والاقارب للاسف كانت في محل عقلي لاني توقعت انه راح يصير شى.....
القصة مختصرة لاني بدايته تتكلم عن حياتي....
حررت في: 2007/4/17 اخوكم احلى_عراقيـــــ

[مـــرار الـألـــــمـــ]

قصة جميلة مشكور اخي

[مملكة الأحلام]