غاليه واغلى ومن الغلا اغلا غاليه وتغلى وحيل القلب يغليها

[أبو رباش]

بسم الله الرحمن الرحيم


السلام عليكم ورحمة الله وبركاته



غاليه ...... واغلى ومن الغلا اغلا
غاليه وتغلى وحيل القلب يغليها

في بيت بو شذى




شذى : يا ربي والله تعبت هب حاله هاي الصراحه أف ... ترن ترن
...:: السلام عليكم
شذى : وعليكم السلام .. هلا والله شحالج اليازية
اليازيه ( صديقة شذى من الثانوية ، وهن ربع وايد. وأمهاتهن ربع )
اليازية : الحمدلله يسرج الحال الغاليه ،، شو اخبارج .. علومج
شذى : والله متبهدله من الصبح احن على ابويه
اليازيه : و حليلج بعده ما وافق على الامريكية
شذى : والله يقول يصير خير .
اليازية : الله يعينج ترا ما بقا شي بيخلص التسجيل
شذى : شو اسوي قوليلي ؟؟؟
اليازيه : المهم حبيبتي لا تحاتين بدشينها بخلي امي ترمس خالو وانشاالله بيرضى عمي .
شذى : الله يسمع منج .
اليازيه : اوكي بخليج وبشوف شما شو صار معاها ..؟؟
شذى : اوكي عيل باي .. و خبريني بالتطورات .
اليازيه : تامرين امر الشيخه باي .
شذى : باي
شذى : اف والله حرام يعني بيفرقوني انا واليازيه ولا بعد شمامي اف والله قهر
ام شذى ( ): شذى شذى وينج تعالي ابوج يزقرج من الصبح
شذى : يايه وهي تنزل من الدري ... الله يستر ما ادري شو بيقول الحين ... يا رب يوافق
ابو شذى : هلا والله ببنيتي
شذى : اهلين بابا شحالك وتسير تبوسه وتبوس امها
ام شذى : حبتج العافيه .. ها شو اخبار الجامعه
شذى : اي جامعه بعدني اتريا الوالد ( تنغز ابوها ) .
ام شذى : ليش ما خبرج ابوج ؟؟
شذى : شو يخبرني .. وتصد على ابوها .. بابا شو بتخبرني خير انشاالله
ابو شذى : خلاص فديتج سجلتج في الجامعه ... ولا بعد قبلوج
شذى ( وهي تناقز ): الله احبكم احبكم بروح الامريكيه الله بروح اتصل في يزوي .
ابو شذى : هههههه حليلها من متى حاطه هاي في خاطرها .
ام شذى : بس محمد ترا درب من دبي لين الشارجه كل يوم !
ابو شذى : والله انا فكرت فيها بس بحطلها دريول بس عسب يوديها الشارجه ويردها دبي
ام شذى : والله برايك يا محمد .
******** شذى في غرفتها ********
شذى : يزوي والله وناسه .. الله بكون معاج
اليازيه : انا قلتلج اصبري بيوافق عمي بس انتي ما طعتي
شذى : هيه والله صدقج اصلا بابا ما يحب يكسر بخاطري ،، بس تعالي شمو شو صار معاها ؟؟؟؟
اليازيه : والله انا اتصلت ووو..............
شذى : لا لا تقولين ما رضى ابوها ؟؟
اليازيه : لا ما رضى اونه جامعه مختلطه
شذى : انزين عادي هي رايحه تدرس هب رايحه تغازل ولا تعاكس
اليازيه : انتي تعرفين ابوها ما يحتاي اخبرج هو كيف
شذى : حرااااااااااااام ما اكتملت وناستي ._.
اليازيه : ههههههههههههههههه
شذى : بلاج بسم الله
اليازيه : قصيت عليج هيه مسجله من متى ... هههههههههه .. ولا بعد اونها بتسويها سبرايز
شذى : الله يخس بليسج .. والله انا بعد على الخط مصدقه .. تقهرين تراج
اليازيه : بس صخي لا .. اقول بروح ارقد من متى وانا اسولف معاج .. مليت الصراحه
شذى : شو يا الخايسه .. اصبري بس انتيي يوم بشوفج بكفخج
اليازيه : باي باي وتسكر التلفون
شذى : الله اليوم برقد وانا مرتاحه ما بفكر في الجامعه .. ايه بس تعالو شو البس للجامعه . لازم اخبر ماما ابغي اروح اشترى لي ثياب .. باجر انشاالله ..
( اونها ما بتفكر )

(أثناء ذلك )
في بيت بوطحنون

ام طحنون : يا مرحبا الساع
... : يامرحبا ملايين ولايسدن شحالج خالو
ام طحنون: بخير يسرج الحال ، انتي شخبارج وشخبار امج فديتها والله من زمان مارمستها
.. : والله الحمدلله كلهم بخير ، وتراها امي بعد تسأل عنج
ام طحنون : والله شو اسوي هاي عويش مأذتني كل يوم و بتروح مكان
..: ههههه هب مصدقه حليلها ، المهم خالو وينها عويش
ام طحنون : في حجرتها روحيلها
...: اوكي
عويش في حجرتها تجهز للجامعه
يدقون الباب عليها
عويش : منو ..شو تبغون بعد
..: السلام عليكم
عويش : نجوله حبيبي ، وعليكم السلام
نجلا وعاشه ( ربع من الاعداديه.. وهن مثل الخوات ... عويش : وايد صريحه ودفشه في بعض الاحيان ... شخصيه صراحه ولا احلى ( عند البنات ) ... خوافه وجبانه وخجوله ( مع الشباب ) ... نجلا : حساسه زياده عن اللزوم .. وخجوله ...
نجلا : خيبه الحين في حد يستقبل ربيعته جذه
عويش : سوري والله رشود ملعوزني
نجلا : هذا بعده يحط دوبه في دوبج
عويش : هيه فاضي لا شغل ولا مشغله .. يحب يستفزني .. يقهر
نجلا : المهم شو تجهيزات الجامعه
عويش : والله كل شي ترتوب .. الا تعالي انا بروح ميغا يوم الاربعا
نجلا : انا بروح معاج بس بشاور امي عقب
عويش : لا عاد اذا بتشاورينها بتوافق ... الا تعالي انتي ما قلتي انتي بتروحين عند ابوج ( نجلا ابوها وامها مطلقين ... وترووح تقريبا في كل ويك اند عند ابوها )
نجلا : لا انا قايلتله اني ما بروح عنده لنه منشغله في تجهيزات الجامعه .
عويش : هيه تعالي على طاري خربطيشن الجامعه ... اسوم تبغي تطقم في اللبس
نجلا : هب حلو ...شو نحن هب يهال
عويش : شو عرفني هيه حليلها بعدها تتحرانا في المدرسه .
نجلا : شكلها . اقول انا طولت بروح البيت
عويش : مسرع توج يايه
نجلا : شو توني يايه من الصبح ميلسه مع خالو
عويش : انا اقول ليش اتأخرتي
نجلا : انزين قوووووووووومي ( وهي تسحب عاشه ) يلا وصليني البيت .
عويش : انزين صبري ........ يا ربي خليني ألبس شيلتي وانتي انزلي انا بلحقج
نجلا : اوكي ( وهي ظاهره من الحجره تنصدم في راشد اخو عويش عمره 23 سنه .. وهو واحد يحب يغصص على عويش )
راشد : السلام عليكم
نجلا ( تتحجب عدل ) : وعليكم السلام .. وتروح نجلا عنه
راشد ( والله وكبرتي يا نجول ... وحلويتي بعد ... والحبيب سرح في نجلا ... )
عويش : ايه رشوووووووود ( وهي تصرخ ) وين رحت ؟؟؟
راشد : خيبه تخيبج .... بلاج انتي ما عندج اسلوب ... الحين الجن لو سمعوا صوتج بيشردون من الفريج هب من البيت .
عويش : قول ما شاالله بلاك ماتذكر الله ... باجر لو حسي اختفى ياويلك سواد ليلك ...
راشد : روحي لاه .. سيري عند شيختج
عويش : منو هاي؟؟؟؟؟
راشد : نجول ( هو يغايضها )
عويش : تخسي إلا انته .. اصلا انا شيخة البنات كلهن
راشد : صخي لا ( ويرقع باب حجرته في ويها )
عويش : شوفوا الخايس ... براويه ... اوي صح نسيت نجول
( وهي تنزل من فوق )
عويش : نجول .. نجول ( تصرخ )
ام طحنون : بلاج تزاعقين ... نجلا راحت بيتهم
عويش : لا ليش راحت مستعيله هاي
ام طحنون : والله انتي تحيرتي على بنت الناس .. شو تبغينها تترياج
عويش : هي عيل تروح بدون ما تخبرني ... وسحبتني سحب من الحجره عسب اوصلها ... والله مره ثانيه مابسويلها سالفه .
ام طحنون : عواش .. تراج مصدقه عمرج ... تعالي فديتج يلسي حذالي .
عويش : ها ييت ( وتيلس بحضن امها ) امي لا تنسين بروح الميغا بعد باجر ونجول يمكن تروح معاي
ام طحنون : يصير خير لين الاربعا ... هب شكله ابوج طول في الرده
عويش : ما ادريبه يمكن عند الغيرل فرند ماله
ام طحنون : شوووو بعد ها غيل فلند
عويش : ههههههههههه حلوه .. امي هاي تعني حبيبته
ام طحنون : لا بسم الله عليه ... ابوج ما عنده هاي السوالف
عويش : امي كل الرياييل عندهم غيرل فرند ... اكيد بابا عنده .. وبعدين انتي عيوز لا زم نوديج امريكا عسب تسوين عميلة تجميل .
ام طحنون : هيه انتي علقي هذا إلي فالحه في انتي .. هيه الله ياخذها امريكا ولديه هناك عندهم ... مختطفينه الله يلعنهم من قوم
عويش : هيه والله حمدانو اكيد انحرف
ام طحنون : بلاج انتي اليوم تدعين وتفاولين علينا كلنا ..
عويش : ما قلت شي .. اقول انا بروح ... غود نايت .
ام طحنون : تصبحين على خير ... والله هاي البنيه متمنكره ( الله يعينه إلي بياخذج ويعين اهله )

راشد ( في حجرته يفكر بنجلا ) ماشاالله عليج والله وصرت حرمه ... ولا بعد تستحي ... استغفر الله الحين انا يالس افكر ببنت الناس .. عوذ بالله من الشيطان .. وراح وانسدح على شبرتيه .. لين ما غفى ورقد

يوم الأربعا في بيت بو طحنون

راشد : حمود بسك هياته والله البارحه كنا ظاهرين .
حامد ( ربيع راشد ... هو معاه في الجامعه .. ومن ايام الجامعه وهم ربع )
حامد: اخبرك تراك غادي شرات امي ... بسك هياته وبسك هياته .
راشد : اوهو شو يعني غصب لازم اظهر معاك .. والله هب متفيج
حامد : افا .. يابوسنيده تردني ؟؟
راشد : شكلك بتذل اخلاقي ؟!
حامد : ابوي خلاص برايك اذا ما بتظهر بدور لي حد من الربع ... مع السلامه
راشد : مع السلامه .
حامد : والله انه سخيف ...شو بعد ما يبغي يروح ... دومه ينكد عليه مشاريعي الحلوه .. الحين شو اسوي ؟؟؟ .... هيه صح سواف خلا اتصل فيه
سيف : يا مرحبا الساع ... هلا والله شحالك الشيخ ؟؟
حامد : ههههه مرحبا مليون ... والله يسرك الحال
سيف : والله توك طريت على بالي .. كنت بتصل فيك ...
حامد : شفت عاد ... المهم شو تسوي ؟؟
سيف : والله كنت ابغي اشوف فلم معروض في السينما .. بس الربع مشغولين ..
حامد : والله عيل خلاص ... بعزمك على السينما ... وبعد العشا عليه انا .
سيف : وين انزين نسير ؟؟
حامد : الستي تراه قريب منك .. بمر عليك و بنروح السينما ..
سيف : خلاص .. بروح اتلبس يلا نتلاقى .
حامد : باي
سيف في حجرته يتعدل ويتعطر
...: سواف
سيف : هلا والله بيزوي ما شفتج اليوم ؟
اليازيه ( اخت سيف وهي اصغر منه عمرها 19 وسيف 23 سنه .. و طبعا هي دلوعة سيف مثل ما يسمونها )
اليازيه : اهلين ... والله كنت مشغوله رحت برجمان اشتري لي بدل للجامعه
سيف : هيه شو خلاص قبلوج ؟؟
اليازيه : اكيد .. اصلا امريكية الشارجه متستانسه لأنها بتستقبلني
سيف : هههههه وايد مصدقه عمر ج انتي .
اليازيه : اكيد انا بنت علي يرفضوني ... يخسون هم .. إلا تعال وين رايح ؟؟؟
سيف : بظهر مع حمود
اليازيه : اوكي عيل ... ابوي لا تروحون تغازلون هناك ... عيب والله .. تراه هذا حامد لو امي تعرف سواياه ما خلتك تظهر معاه .
سيف : اوكي ...انشاالله تآمرين على شي ؟؟
اليازيه : سلامتك الغالي
سيف : الله يسلمج .. باي
اليازيه : باي
سيف ( وهو نازل من فوق يمر بغرفة امه ) : هلا امي
ام سيف : اهلين الغالي .. تعال اقرب
سيف : هلا الغاليه .. شحالج اليوم .. شو ريلج ؟؟
( ام سيف .. حليلها في هشاشة عظام والدكتور قايللها ما تمشي وايد ولا تيلس وايد )
ام سيف : والله الحمدلله ما نشكي باس .
سيف : فديت امي .. ( ويرفع يديه ويدعي ) اللهم رب الباس اذهب الباس عن امايه.
ام سيف : هههههه شو هذا الدعاء ... الله يوفقك ..
سيف : هذا دعائي ادري سبيشل .
ويرن تلفونه
سيف : ها نازل نازل اصبر
حامد : اوكي ما قلت شي .
يظهر سيف من البيت ويركب بسيارة حامد ( نيسان اسود )
سيف : شحالك ؟
حامد : تمام .. تعرف قلت لرشود تعال معانا ما طاع اونه هب متفيج
سيف : حليله انزين يمكن عنده ظروف الريال
حامد : اي ظروف الله يخليك ما وراه حرمه ولا عيال ؟
سيف : بتتعوض انشاالله ..
حامد ( يحط شريط ميحد اغنية طير الحمامي .. وسيف يعشق هاي الاغنيه ويطول عليها ويغنون هم الاثنين )










في دبي تحديدا بيت ( شذى )

ام شذى :اقول محمد ( ابو شذى) ترى ناس اليوم يسألوني عن شذى
ابو شذى : خير انشاالله ؟
ام شذى : لا بس شكلهم بيخطبونها حق حد من اهلهم
ابو شذى : ليش هم فاتحوج في الموضوع ؟؟
ام شذى : والله الحرمه قالت لي هم يدورون بنيه لولد اختها
ابو شذى : اها تحريت رسمي خطبوها
ام شذى : الله يسمع منك ... والله البنت كبرت ولازم تزوج .. ابغي اشوف عيالها
ابو شذى : بس هيه بعدها صغيره وبنتي ما بياخذها حد عني
ام شذى : شو يعني بتتمسك في البنت طول حياتك
ابو شذى : والله بنتي وابغيها وانا صراحه قايل هيه ما بتاخذ واحد غريب
ام شذى : انته جذه استويت .. وهم ما خطبوها عيل اذا خطبوها شو بتسوي
ابو شذى : اقول طبي السالفه الحينه .
( ويروح ابو شذى الغرفه وهو يفكر ببنته .. وانه مجبور في يوم من الأيام انا يتخلى عن بنته , وهو هب متقبل فكرة انه شذى بتروح عنه بعيد , بس بعد لازم يفكر فيها وانها بتنظلم اذا قطع نصيبها )

شذى : يزوي شو تسوين ؟
اليازيه : والله يالسه على المسن .
شذى : ليش ما تخبريني ؟
اليازيه : توني يالسه بلاج ؟؟.
شذى : منو معاج ؟؟
اليازيه : شموه ( شما ربيعت اليازيه وشذى .. وهن الثلاثه من دبي .. وبيروحون الجامعه نفسها ... شما امها متوفيه و)
شذى : اوكي عيل بخليج سلمي عليها .
اليازيه : تعالي ليش ما بدشين المسن .؟
شذى : لا الوقت متأخر .
اليازيه : الساعه 9 ومتأخر يا الديايه
شذى : اقول باي باي ( وتسكر التلفون )

اليازيه : هاي بلاها ؟؟
وترد ترمس شما على المسن .
شما : يزوي وينج ؟؟؟
اليازيه : موجوده بس شذى .. شكلها زعلت مني .
شما : ليش بعد ؟؟
اليازيه : ما ادري والله .. المهم شو الحين جهزتي للجامعه ؟؟
شما : هيه وخلصت بعد .
اليازيه : اكيد مخلصه .. تعرفين اي جامعه بتسيرين قبلنا .
شما : ليش انتي ما خلصتي ..؟؟
اليازيه : لاء اليوم رحت برجمان بس ما حصلت بدل حلوه .
شما : اها تعرفين وين تروحين ؟؟
اليازيه : وين بعد ؟؟؟
شما : سيري الشارجه ميغامول
اليازيه : شو تهقين عندهم بدل حلوه ؟؟
شما : هيه انا رحت شريت من السيتي وميغا بعد .
اليازيه : خلاص بس بشاور امي وابوي
شما : خلاص عيل انا بظهر .. باي
اليازيه : باي
وتسكر المسن والكمبيوتر وتروح تنام

في بيت بو طحنون ( الشارجه )

راشد : شوشه شوشه تعالي بسرعه
عويش : هلا شو بغيت ؟؟
راشد : روحي تلبسي بنظهر
عويش : الله اوكي بتلبس وبرجع
راشد : اسألي اول وين عقب .. ما تصدقين انج بتظهرين من البيت
عويش : اف ... انزين وين بنروح ؟؟
راشد : بروح اشتري لي عشا
عويش : اوكي ( وتروح حجرتها تتلبس )
راشد : ما تصدق هاي البنيه انها بتظهر ... ههههههه .. حليلج يا عواشي الله لا يحرمني منج
ام طحنون : آمين يا رب الله لا يحرمني من عيالي كلهم .
راشد : امايه .. خوفتيني ...( ويروح يبوس امه ) شو ابويه وين ؟؟.
ام طحنون : توه راد من الميلس
راشد : بروح عنده شويه
ام طحنون: خلاص عيل بجهز العشا حقكم
راشد : لا لا تجهزين انا بتعشى برع مع شوشه
ام طحنون : برايكم عيل انا بروح اسوي لي شاهي
راشد ( يدق الباب على غرفة ابوه .. غرفة ابوه وامه تحت ... وغرفته هو وطحنون و حمدان وعواشي فوق )
ابو طحنون : منو ؟
راشد : ( يفج باب الغرفه ) انا رشودي
ابو طحنون : هلا والله بولدي .. شو وين بتروح ؟؟
راشد : بروح مع عواش بنتعشا .
ابو طحنون : هيه وينها اختك ؟؟
راشد : سارت تتلبس .. ابويه إلا شخبارك ؟؟
ابو طحنون : الحمدلله تمام .. بس تعبان شويه
راشد : عسى ما شر ؟
ابو طحنون : اشغال الشركه ما تخلص . ( ابو طحنون عنده شركة محاماه )
راشد : هيه .. عيل خلاص بس بغيت اطمن عليك بروح اتلبس .. يلا مع السلامه
ابو طحنون : مع السلامه .. بس تحمل على اختك .. ولا تسرع
راشد : فالك طيب الشيخ ( ويظهر من الحجره ويلاقي عويش )
عويش : ها اشوفك ما خلصت ؟؟؟؟ وهي معصبه
راشد : كنت ارمس ابويه
عويش : هيه تعال ما شفته اليوم روح انته تلبس وخلص بس بسرعه
راشد: لا بعد تتشرطين
عويش : روح لاه
راشد : خلاص هونت ما بروح ..
عويش : لا حرااااااااااااااااااااام ( وهي شويه وبتصيح )
راشد : ما ابغي خلاص
عويش : رشوووووووووووودي ( بدلع ) يلا خلنا نتعشى .. انته يوعان
راشد : هههههههههههههههه انزين خلاص رضيت بروح اتلبس وبرجع
عويش : تفتح باب حجرة ابوها ) بابا وتنط عليه
ابو طحنون : عواشي الحلوه شحالج ؟؟؟
عويش : تمتوم .. انته شحالك وشخبارك وعلومك ؟؟؟
ابو طحنون : ههههههه شوي شوي عليه
عويش : اقول تراني بروح مع رشود .. بنتعشى
ابو طحنون : هيه ادري خبرني ...
عويش : بابا تدري اليوم انته حليو وصراحه فنان
ابو طحنون : قولي كم تبين خلصيني ؟؟
عويش : ههههههه كيف عرفت اني ابغي بيزات ؟؟
ابو طحنون : بنتي واعرفج .. يودي خمسميه
عويش : واااااااااايد .. انا عندي بيزات من البارحه
ابو طحنون: برايج خلاص ما تبغينها
عويش : لا( وتسحب البيزات من ابوها) ابغيها ههههههه .. عسب اترس بوكي
ابو طحنون : خلاص عيل .. ها لا تضاربين مع رشود
عويش : لا شو انا هب ياهل
ابو طحنون : خلاص عيل انا بروح ارقد
عويش : تصبح على الطاعه .
ابو طحنون : وانتي من اهل الشفاعه .
عويش ( تظهر من الغرفه ) وتركب سيارة راشد
راشد ( يفج باب السياره.. سيارته طوارق بيضا ) : خيبه بلاج هب مصدقه ؟؟ وبعدين من سمحلج تشغلين السياره ؟؟
عويش : كيفي .. وبعدين فلت بوفر عليك الوقت
راشد ( يركب السياره ) : ها وين تبغين تروحين ؟؟؟
عويش : صحااااااااااااااااااااااااااااااااااااااااااارى
راشد : لا ما بروح صحارى
عويش : عيل وين ؟؟ ( بزعل )
راشد : ما ادري بنروح دبي
عويش : اممممممممممممممممم ... ( تفكر )
راشد : شو رايج السيتي ؟؟
عويش : اوكي المهم اظهر
راشد : خلاص نحن رايحين لدبي

وفي دبي ( سيتي سنتر )

حامد : الصراحه الفلم عجيب .
سيف : هيه وايد .. إلا اقول وين بنتعشا ؟؟
حامد : ما ادري ؟؟
سيف : شو رايك في (اونوز)
حامد : يلا عيل
( سيف وحامد يدشون المطعم .. ويتناقشون في الأكلات الموجوده في المنيو )

نرجع لراشد وعاشه
راشد : اقول عويش شو وين بتتعشين ؟؟
عويش : ما ادري ما اذكر اسم المطعم إلي رحتله مع طحنون
راشد : اوكي خلينا نسير صوب ردهة المطاعم يمكن تذكرينه
عويش : اوكي .. بس اذا انته في خاطرك مطعم غيره عادي
راشد : لا والله اصلا ما اعرف شو باكل ؟
عويش : اوكي يلا خلنا نسير ( ويدشون المطعم*اونوز* .. ويختارون طاوله بعيده شويه عن طاولة سيف وحامد )
الغرسون : هلو غود ايفنغ ( هاي مساء الخير )
راشد و عاشه : هاي غود ايفنغ
راشد : شو بتطلبين شوش؟؟
عويش : ما ادري شو رايك باستا ولااا اممممممممممم؟؟
راشد : ولا شو ؟؟
عويش : ستيك ؟؟
راشد : باستا
عويش .. بس محد يظبطها مثل لونا روسا
راشد : ما ادري جربيها هنيه
عويش : اوكي بطلب باستا .. وانته ؟؟
راشد: اممممممممم ( يرن موبايله ) الو
حامد : الو شحالك ؟؟؟
راشد : تمام .. شو الفلم
حامد : والله اوكي .. انته وين حشره عندك ( يستهبل )؟؟
راشد : انا في السيتي
حامد : لا والله هب قبل شويه كنت تقول هب متفيج ؟؟
راشد : شو اسوي مودي تغير
حامد : هيه مع منو انته ... لا تقول مع سهيل؟؟
راشد : لا مع الأهل .. انته وين ؟؟
حامد : انا في المطعم إلي انته فيه
راشد : وينك ... هيه شفتك .. منو معاك ؟؟
حامد : سواف .
راشد : اصبر الحين بسلم عليكم .. باي ( ويسكر الموبايل )
راشد : عواش انا بروح اسلم على ربعي وبرجع اوكي .. اطلبي لي بيتزا
عويش : اوكي ( وتتصل في نجول )

طاولة سيف وحامد
راشد : السلام عليكم والرحمه
سيف و حامد : وعليك السلام
راشد : شحالك سيف ؟؟
سيف : بخير يسرح الحال .. إلا انته شحالك .. وليش ما ييت معانا؟؟
راشد : انا تمام .. بس ما احيد الأخ حامد خبرني انك بتكون موجود معانا ( ويشوفونه سيف وراشد بنظره)
حامد : اصلا انا ما كنت ادري انه سيف بيكون موجود ( يبغي يتهرب من الاجابه )
سيف : اها عيل جذ السالفه .. تعال مع منو ياي ؟؟
راشد : مع الأهل
حامد : اي اهل اكيد حبيبته ما يبغي يخبرنا عنها
سيف : ههههههههه ما حيدك راعي سوالف بنات بو سنيده ؟؟
حامد : انا ادرى بحاله .
راشد : ايه احترموا نفسكم شو شايفيني انتوا
سيف : افا يا ريال ..ز رمسنا وحبينا وحده قلتوا الريال راعي سوالف
حامد : منو هاي إلي حبيتها ؟؟؟؟ ( والفضول بيجتله)
سيف ( يغمز له و يهمس له ) : اقص عليه يا ريال لا تخرب
راشد : بلاكم ؟.؟؟
سيف : ها ولاشي روح ورح طولت تراك
حامد : هيه لا تخليها تحاتيك
راشد : والله ان ياي مع الأهل .. اوكي الحين ما بطول عليكم يلا كملو عشاكم
حامد : قصدك ما بتطول على حبيبتك ... ويضحكون على راشد
راشد : يلا فمان الله
سيف وحامد : فحفظ الرحمن
( يروح عنهم راشد )
سيف : يعني لازم تفشل الريال انته
حامد : صراحه منقهر منه .. ليش ما بغى يسير معاي
سيف : احمد ربك اني وافقت , وإلا انتحرت
حامد : هيه والله خلنا نتعشى يا خي

على طاولة راشد وعويش

( عويش ترمس نجلا في الموبايل )
عويش : نجول والله المهم سلمي على اسوم وقوليلها نتلاقى في الجامعه ..
نجلا : اوكي الله يسلمج .. باي
عويش : باي
راشد : ها خلصتي ؟؟
عويش : هيه قلت انته بتطول اتصلت في نجول
راشد : شحالها ؟؟
عويش : متحمسه للجامعه .. تعال انته بتوديني الجامعه ؟؟
راشد : لاء ما اقدر اتأخر عن الشغل
عويش : عيل منو بيوديني ؟؟
راشد : طحنون ولا الدريول
عويش : اوكي عيل خلنا نتعشى يعت

( عقب العشا طبعا وهم في الدرب )
راشد : تعبت من الأكل
عويش : انا بعد .. بس عسب الطلعه تكتمل ابغيك تمر على باسكن
راشد : هب توج تقولين تعبت من الأكل؟؟
عويش : انزين انا مشتهيه اسكريم وبعد لا تنسى خذ لطحنون
راشد : انشاالله تامرين على شي بعد الشيخه
عويش : سلامتك برذر
راشد : الله يسلمج
( المهم ياخذ لها اسكريم ويرجعون البيت )


في بيت محمد ( شذى )
شذى : امي ... ابغي اروح اشتري لي ثياب للجامعه
ام شذى : شاريلج درزن ثياب ما يكفونج ؟؟
شذى : لاء بعدين لازم ما اعلق على نفس الثياب
ام شذى : يصير خير باجر انشاالله
شذى : اوكي ... بروح اتصل في يزوي
شذى : الو يزوي
اليازيه : هلا وغلا شحالج ؟؟
شذى : اهلين .. تمام .. اقول باجر بروح اشرى للجامعه بتين ؟؟
اليازيه : لا ما اقدر
شذى : ليش ؟؟
اليازيه : لازم اشاور ابوي وامي
شذى : انزين شاوريهم عقب
اليازيه : بشوف
شذى : اوكي باي
اليازيه : باي
( اف ليش تأخر سواف )
سيف (يدش الصاله ) : السلام عليكم
اليازيه : وعليكم السلام ..شو غازلتو ؟؟؟
سيف : شو رايج ؟؟
اليازيه : اكييييييييييييييييييد
سيف : اووكي عيل .. تعالي ليش ما رقدتي ؟؟
اليازيه : اترياك
سيف : حبيبتي والله ... لو ادري ما تحيرت
اليازيه : لا عادي .. كنت اشوف مسلسلي
سيف : اها قولي جي من الصبح
اليازيه : ها تراني قلت
سيف : اوكي انا بروح ابدل وانام .. تصبحين على الطاعه
اليازيه : وانته من اهل الشفاعه
( ويروح سيف غرفته ... وعقبه بشوي تروح اليازيه حجرتها ... وينامون .. طبعا . .. بس خلنا نشوف سواف)
سيف : ههههههههههه انزين شو اخبارج الغاليه ؟؟
...: تمام
سيف ( الله يغربلها تملل بالواحد) : اقول انا الحين برقد باي ويسكر في ويها
....: هذا بلاه ؟؟ دفش
سيف : خلني ارقد احسن من هاي السوالف التافهه
وقبل ما يرقد يرن موبايله
سيف: الو
حامد : بسم الله بلاك ؟؟
سيف : ها لا بس كنت ارمس الغبيه بدورو
حامد : هيه .. تعال الا اخبرك منو هاي إلي حبيتها ؟؟
سيف: نعم نعم اصلا ما عاشت من هي تيب راس سيف بن علي
حامد : إلا كنت اتحراك حبيت من وراي
سيف : مستحيل شل هاي الفكره من راسك
حامد : ابويه في آخر المطاف مردك بتحب
سيف : اقولك انسى هاي الفكره
حامد : يوم بتحب بذكرك برمستك
سيف : وبكون عند كلمتي ... لا تتحداني يا حمود
حامد : خلاص اوكي ... مع الأيام بنشوف من هاي الغزال إلي بتيب راسك
سيف : اوكي .. ازعجتني صراحه . خلني ارقد
حامد : يلا تصبح على خير
سيف : وانته من هل الخير
( وسيف يرد يفكر برمسة حامد ... وفجأة يغفي ويرقد )

في بيت بو طحنون

عويش : طحنون شحالك ؟؟
طحنون ( اكبر اخوان عاشه وعمره 25 ... وهو دومه في الشركه .. محامي ... ووايد يحب عاشه )
طحنون : تمام ... صباح الخير اول
عويش : صباح النور .. تريقت ؟؟
طحنون : لا .... وانتي شكلج توج ناشه ؟؟
عويش : يس .. خلاص بروح اسوي لنا ريوق
طحنون : اوكي ..
( وتروح عويش تسوي ريوق لها ولطحنون )
راشد : هلا طيطو
طحنون : احترم نفسك .. اخوك العود انا
راشد : ادري .. لاتنكد عليه يومي .. ( يقلده ) اخوك العود انا
طحنون : رشووووود ( بدا يعصب )
راشد : خلاص اوكي .. وين شوش؟؟
طحنون : راحت تسوي ريوق
راشد : بروح عندها بخليها تسويلي انا بعد ( ويروح لها المطبخ )
( عويش صاده عنه وعاطتنه ظهرها .... فجأة )
راشد : بوووووووووووووووووو
عويش : ( تفر عليه البيض ) الله يغربل بليسك ... يا الخايس رشود
راشد: ههههههههههههه خيستيني
عويش : دواك يا الطفس
راشد ( يغسل كندورته بالماي ): سويلي ريوق
عويش : نشاده عنك انا
راشد : افا ... خلاص عيل ما بظهرج مره ثانيه
عويش : خلاص خلاص ... بسويلك
راشد : اوكي .. مشكوره ... وصليه الصاله عقب
عويش : طرار ويتشرط

في الصاله

طحنون : شو بتطبخلك ؟؟
راشد : اكيييييييد ..
طحنون : كيف اقنعتها ؟؟
راشد : بطريقتي الخاصه
طحنون : لا تقول قلتلها ما بطلعج ؟؟
راشد : كيف عرفت ؟؟
طحنون : بعد ربك
عويش : يلا تريقوا ...
طحنون : تسلمين الغاليه
راشد : مشكوره على ها الطبيخ الحلو
عويش : العفو ... تعال طيطو
طحنون : ( بعصبيه ) شووووووووووووو
عويش : اااااااااااااا طحنون
راشد : ههههههههههههه خوفوها
عويش: صخ عني انته
طحنون : نعم ؟
عويش : ابغي اروح الميغا وصحارى
راشد : ليش ؟؟
عويش : انا رمستك انته ؟؟
طحنون : ليش ؟؟
راشد : شفتي انا اعرف طحنون
عويش : بشتري لي بدل
طحنون : انا ما اقدر بتلاقى مع ربعي اليوم ... روحي مع امايه
عويش : يعني انتوا موافقين ؟؟
راشد : انا لا ... شو بعد تروحين صحارى بالخميس( معصب )
عويش : طحنووووووووووووون شوفه
طحنون : ليش انتي متى ناويه تروحين ؟؟
عويش : بعد اذان المغرب
طحنون : ماشي
راشد : تستاهلين
عويش : ليش انزين ؟؟
طحنون : تعرفين كيف صحارى بالخميس زحمه زياده عن اللزوم
عويش : انزين انا بروح اشرى .. ما بتحوط
طحنون : ( يصارخ ) قلتلج ماشي تفهمين
عويش .( تسكت من الزيغه )
راشد : شو بعد هالمنكر بروح صحارى اونه
عويش : انزين بروح الحين اول ما يفتح
طحنون : مع منو انشاالله ؟؟؟ ( هو شويه وبيكفخها )
عويش : بروح مع نجول واسوم
رشد : اي تراج وايد ماخذه راحتج
عويش : شو بعد ؟؟
طحنون : اذا قبل الغدا اوكي .
عويش : الحمدلله اخيرا طعتوا ... ها الأخ راشد شو رايك ؟؟
راشد : اوكي روحي
عويش : بتصل في نجول واسوم

عويش(في حجرتها تتصل في اسما ونجلا طبعا عقب حنه ورنه وافقت نجلا )

في صحارى
اسما( ربيعت عاشه ونجلا من الاعداديه ... و بتكون معاهم في نفس الجامعه )
نجلا : اخيرا خلصنا
عويش : هيه تعبت صراحه
اسما : انا يعت ابغي آكل
عويش : ههههههه كله تاكلين
نجلا : الحين في ذمتج انتي ما يعتي ؟؟
عويش : بلى
اسما : عيل خلاص .. الغدا على حسابي .
نجلا : وين بتتغدون ؟؟
عويش ( بما انها حافظه صحارى بكبره ): امممممممم شو رايكم في باستا ؟؟
نجلا : هب البارحه كنت ماكله باستا
عويش : بلى .. بس شو اسوي احب الباستا
اسما : اوكي يلا ..
( وعقب ما طلبوا يلسو على الطاولات إلي على تحت )
نجلا : اقول عواش
عاشه : هلا
نجلا : شوفي هذاك الولد كيف يطالعج
اسما : متفيجه تراج نجول
نجلا: والله شوفي اكيد معجب
عويش : ههههههههه اكيد اصلا
اسما : ههههههههه حلوه
نجلا : شوفي السخيف
عويش : نجول لا تشوفينه
نجلا : ما اقدر تعرفيني كيف انا
اسما : انزين بس حشمي نجول
نجلا ( زعلت ): اوكي خلاص ...
عويش : زعلت الحبيبه
اسما : سخيفه تراج
نجلا : صخي عني .. كملي غداج
عويش : فشلتونا الصراحه بس خلصوا
( عقب ما خلصوا سوالفهم و غداهم )
اسما : اقول هذا بعده موجود
نجلا : من الصبح اقوللكم
عويش : خله يولي
نجلا: اوكي ( وهن صاعدات الدري .. طبعا اول وحده كانت عواش )
...: الشيخه سجلي الرقم
( عواش جبانه يعني اذا واحد تحرش فيها تخاف وايد ... وتظهر ملامح الخوف عليها ... وهنه بدت تخاف عقب ما كانت مشجعه )
نجلا : عواش تحركي يلا
...: الشيخه عاشه سجلي الرقم دخيلج
عويش : الله يخس بليسج يا نجول عرف اسمي
اسما : تحركن بسرعه يلا هو وراي
عويش : نجول هو بعده ورانا
نجلا : هيه هب طايع يروح
اسما : اقول ابغي آخذ لي سنبون
عويش : وقته انتي بعد يلا بسرعه خذيه
( ويروحن عند محل السنبون... ويقرب الولد منهم .. وطبعا كلهن ميتات من الزيغه )
نجلا : اسوم يلا بسرعه
اسما ( ببرود): انزين اصبري يالس يحطه في البوكس
عويش: يا ربي هذو يا صوبنا
...: اقول الشيخه ما بهدكم لين ما تاخذين الرقم وو تتصلين عليه الحينه
نجلا ( بصوت عالي ): شووووووو
عويش : قصري حسج نجول
...: انا ما اقصدج انتي اقصد عاشه
عويش(بعصبيه و خوف) : يا ربي روح فشلتنا جدام العالم
...: انا قلت ما بروح لين ما تاخذين الرقم وتتصلين
اسما : خذي عويش فكينا من حشرته
....0 يتدخل واحد من الشباب إلي كانو موقفين حذالهم تقريبا)
...2: السموحه اختي شو المشكله
اسما : شوف هذا صراحه هب طايع يخلينا بحالنا
...: انته منو اخوهم
...2: هيه
..: (مرتبك ) آسف اختي ما كان قصدي
(ويروح )
...2: خلصتوا ؟
اسما : نعم اخويه
...2: اذا خلصتوا بوصلكم لي السياره عسب ما يتحرشون فيكم الشباب
نجلا ( زل لسانها ): هيه دخيلك وصلنا
عويش (ترمقها بنظره... وتقول لها بذبحج )
( الولد يوصلهم لين السياره ( سيارة اسما) )
اسما : مشكور اخويه
...: العفو .. تأمرون على شي
اسما : سلامتك
( يركبن السياره )
عويش ( محتشره ) : انتي وياها ما تخيلن تدقون سوالف مع الريال
اسما : احمدي ربج خلصج من الولد
نجلا : هيه ... يوم انج معصبه عليه ليش ما رمستي وقلتي له ما نبغيك توصلنا
عويش : الحين لو اخوي شافني
اسما : انتي ما سويتي شو غلط
عويش : اف خلا ص انزين

في السنتر
...: شو فصول وصلت البنات ولا ؟
فيصل : هيه .. اكيد ...إلا عبد العزيز وحده فيهن انا اعرفها
عبد العزيز : نعم...و كيف ؟؟
فيصل: ما ادري بس هي مألوفه
عبدالعزيز : اها اتحرا بعد
فيصل : شو بعد
عبد العزيز : لا ولاشي

يرن تلفون فيصل
فيصل : هلا والله بحمدان
حمدان : اهلين شحالك فصول ؟؟
فيصل : تمام .. انته اخبارك واخبار الدراسه ؟؟
حمدان : تمام ... شحال الاهل ؟؟
فيصل: الحمدلله كلهم بخير
حمدان : اقول ابغيك تتصل في راشد اخويه
فيصل : ليش ؟؟
حمدان : لا بس قوله خلهم ينظفون حجرتي
فيصل : بترجع البلاد ؟؟
حمدان : هيه
فيصل : خلاص بروح البيت عندهم اليوم فليل
حمدان : اوكي برذر سلم عليهم .. باي
فيصل :باي
عبد العزيز : منو حمدان ؟؟
فيصل : هيه بيرد البلاد
عبد العزيز : وحليله اربع سنين برع البلاد.. اخيرا
فيصل : اقول برجع البيت انا لأني بمر على بيت عمي
عبدالعزيز : خلاص عيل مع السلامه
فيصل : مع السلامه

في بيت بوطحنون

راشد : هيه انا في البيت
فيصل : خلاص بمر عليك
راشد : اوكي نتلاقى باي
فيصل :باي
عويش : ها شحالك
راشد : تمام شو رديتي ؟؟
عويش :: شو رايك ؟
راشد : هههههههه انزين قولي لأمي خلهم يجهزون الفواله
عويش : ليش ؟؟
راشد : فصول بيمر البيت
عويش : اوكي . ( تفكر ... من زمااااااااااان ما شفتك يا فصول الحين تذكرنا )
راشد : وين سرحتي ؟؟
عويش: ها اوكي
( عقب اذان العشا )
عويش : راشد فيصل في الميلس
راشد: اوكي
( في الميلس )
راشد : يا مرحبا الساع
فيصل: مرحبا مليون .. شحالك ؟
راشد : تمام .. شو وينك عن الدنيا ؟؟
فيصل : موجود ... إلا اقول شخبار عمي ؟؟
راشد : تمام ... اصبلك شاهي
فيصل : لا والله مشكور بس بغيت اخبرك انه حمدان اتصل وقال جهزوله غرفته بس لا تخبر عمي ولا حرمة عمي اونها سبرايز
راشد : اها ... اوكي ... تعال اقرب داخل البيت ... امي تبغي تشوفك
فيصل : يلا
( يدشون الصاله ) .. وطبعا كالعاده عواش ميلسه عند التلفزيون تتطالع مسلسلاتها
راشد : هود هود
عاشه : هدا هدا اقرب
راشد وفيصل يدشون الصاله

راشد : عويش روحي زقري امايه
عويش : اف روح انته وهي طبعا مندمجه في المسلسل
راشد : اقول فصول اقرب بروح ازقر امايه وبرجع
فيصل : اوكي
( ومن الفضول فيصل يبغي يعرف منو هاي البنيه ... ومن يشوفها !!!!!!!!!!!!!!!!!!!)
عويش : (تنقز من على الغنفه ) انته هني ؟؟؟؟؟
فيصل : السلام عليكم
عويش : وعليكم السلام .... شو تبغي ؟؟
فيصل : اممممممممممم انتي شو تسوين هني
عويش : هذا بيتنا
ام طحنون : فيصل ابويه شحالك
فيصل : عمو بخير يسرج الحال ... وهو عيونه على عاشه
راشد : عويش سلمتي على فيصل
عويش : فيصل (باستغراب ) ااااا شحالك
فيصل ( ميت من الضحك ) :تمام .. انتي شحالج ؟؟
عويش: بخير ( تذكرته هذا الولد إلي وصلنا للسياره .. اوي بيخبر رشود اكيد عن إلي صار .... واي شو اسوي ...)
النهاية

تحياتي.... أبو رباش

[مملكة الأحلام]

أبو رباش ,,
قصتك متوسطة يعني مو مرة حلوة ,, أتمنى المرة الجايه تكون أحلى من كذا ,,
مشكووور ,, ويعطيك ألف عافية ,,

[زيـ ــ ــ ـد]

أبو رباش القصة إعجبتني حيل

تســــــــــ يأخويـ ـــــــــــلم

[أبو رباش]

تسلم أخوي الحربي كلك ذوق