جدار من القلب إنخلع
وإنهد باب
لما لقيتك بتقابلنى بالعتاب
بتصدنى
وأنا جايه حملالك معانى من تقلها
قلبى عليل من حملها
وقع من الإيد الكتاب
اللى كتبتوإليك بأسطر مهجتى
أناجيك وعنيا قايداهم شموع
لنجوتى
ردتنى بأتلوى بجوع
إستخسرت فيا شبعتى
وأنا صايمه بأستنى الرجوع
وأحلم بكلمة شوق
راح أكسر بيها ريقى
بأحلم بضمه أرتاح بها
من طول طريقى
ضاع حلمى راح
والوعد ساح
جريت حروفو ع الرصيف قدام عينيا
ضاع حلم عمر
حلمتو وراعيتو علشان عيونك
وبإيديا
راحت أمانيا هدر لما لقيت قلبك غدر
ماكنش غدرك منتظر بالنسبه ليا
مش قادره أفسر دمعتى
بأبكى عليك وإلا أبكى
م الحرقه عليا