قصه جراح و يوسف
هاذي اول قصة انزلها في المنتدى واتمنى تعجبكم
جراح ويوسف ربع من زمان وتعرفون المواقف والدقات اللي تصير بين الربع
بس هالمرة الموقف اللي سواه يويسف بجراح موقف ضيع حياة جراح
خلونا نشوف أحداث هالقصة ويا بعض
جراح كان داخل الشات بنك (( أدور على حب )) والحبيب داش جو مو طبيعي
وطايحله سوالف مع بنات خلق الله
إتصل عليه رفيجه يوسف ودار بينهم هالحوار
جـــراح : ألووو
يوسف : ألووو هلا والله جراحووو
جـــراح : هلا فيك حبيبي .. ها خير آمرني
يوسف : شنو آمرني .. ! تصرفني ويا ويهك
جـــراح : لا والله بعد عمري إنت بس آنا منهمك بالشات قز قز مو طبيعي يويسف وناسة
يوسف : ممم خوش عيل شنو نكك .. ؟
جـــراح : ليش بتدخل علي .. ؟
يوسف : لا والله آنا وين والشات وين خبرك عتيج ما قمت أدخل زهقت منه
جـــراح : ممم والله آنا نكي (( أدور على حب )) تعرف يمكن أصيدلي رمااانة من
هالفواكه الموجودين بالشات
يوسف : أي رمان وأي فواكة .. ! حبيبي هذول بنات مو خضرة
جـــراح : ههههههههههااااااااااي
يوسف : أوكي حبيبي آنا ماشي الحين بروح أنام تامرني على شي .. ؟
جـــراح : لا قلبي سلامتك نومة العافيه انشالله
يوسف : الله يعافيك .. تصبح على خير
جـــراح : وإنت من أهل الخير
يوسف : باااي
جـــراح : بااايااات
طبعا يوسف مافيه النوم وأصحى مني ومنكم بس أهو مجهز موقف ودقه
محترمة حق رفيجه جراح
يوسف دخل الشات ودخل بنك (( أبي واحد يحبني )) يعني منتحل شخصية بنية
وقعد ينطر وينطر وياكل بطاااط و بيبسي
لما دخل عليه نك (( أدور على حب )) اللي أهو جراح
جراح المسكين ما يدري عباله بنيه صج
ودار بينهم هالحوار
جـــراح : مساء الخير
يوسف : مساء النور ياهلا
جـــراح : شلونج شخبارج
يوسف : الحمدلله زينة .. وإنت شلونك
جـــراح : آنا بخير دامج بخير
يوسف : دوم انشالله مو يوم
جـــراح : تسلمين ما تعرفنا عليج يا حلوة
يوسف : معاك شيماء وإنت .. ؟
جـــراح : عاشت الأسامي .. معاج جراح
يوسف : عاشت أيامك .. الله إسمك يهبل وااايد حلو ستاااااااااايل
جـــراح : تسلمين من ذوقج .. مادري شلون بنام اليوم
يوسف : لا آنا قلت إسمك يهبل مو إنته .. وبعدين تنام ما تنام كيفك
جـــراح : أووو ليش جذي تكسرين فيني .. آنا زعليت خلاص
يوسف : آسفة
جـــراح : لا كلا واحد .. شيماء جم عمرج .. ؟
يوسف : 18 وإنت ؟
جـــراح : 19
يوسف : العمر كله .. الله إنته أكبر مني
جـــراح : طبعا طبعا .. يالله روحي سويلي بيض طماط بسرعة
يوسف : واي حدك واثق
جـــراح : طبعا واثق .. شيومه شلون الشات معاج اليوم .. ؟
يوسف : يعني .. وبعدين تعال ليش تدلعني .. ؟ من عطاك الحق
جـــراح : تنساني وتروح وحده وحده حتى أستوعب كلامك والجروح
يوسف : واااي ملاقة
جـــراح : شيومة شيومة
يوسف : هلا خير
جـــراح : لا بس قاعد أجرب الكيبورد .. لوووووووووول
يوسف : تصدق عاد إنته تهبل تونس وااايد .. شكلك ما تحب ولا جربت الحب
جـــراح : لا والله ما صار نصيب وبعدين ماكو اللي تستاهل أحبها
يوسف : إي والله صاج .. بس في بنات شحلاتهم يهبلون وأخلاقهم وايد حلوه
جـــراح : إي شيومة في بس قتلج للحين ما صار نصيب
يوسف : إنت مشالله عليك روحك حلوه تضحك وتونس الله يخليك حق أهلك
جـــراح : صج .. ؟
يوسف : إي والله صج .. آنا ما حب أجامل أحد
جـــراح : بعد عمري والله
يوسف : شنو .. ؟
جـــراح : آسف إطلعت عفويه من غير قصد
يوسف : لا عادي
جـــراح : ممم أنا ما أشوفج تضحكين وايد ليش .. ؟
يوسف : إي والله صاج آنا ما أَضحك وايد حياتي تعاسه بتعاسه
جـــراح : أفا ليش .. ؟
يوسف : إنت لما قلتلي بعد عمري آنا وايد استانست بس ما حبيت أبينلك .. آنا محد
يقولي مثل هالكلام .. أهلي بالبيت يعاملوني جني خدامه مو بنتهم
جـــراح : كل هذا فيج
يوسف : وأكثر من جذي
جـــراح : تصدقين ودي أسمع منج وايد سوالفج ما تنمل بس آنا الحين لازم أروح ..
ممكن طلب ..؟
يوسف : تفضل
جـــراح : ميخالف أضيفج عندي بالإيميل هذا إذا ما عندج مانع
يوسف : والله مادري شقولك .. آنا ما أضيف شباب عندي
جـــراح : بس آنا مو من هالشباب وإنشالله ما تشوفين مني إلا كل خير
يوسف : أدري .. وإنت مبين عليك خوش صبي وآنا بضيفك وإنشالله ما أشوف منك قاصر
جـــراح : لا إنشالله ما تشوفين مني إلا كل خير
يوسف : عطني إيميلك وآنا أضيفك
جـــراح : أوكي هذا إيميلي .......... متى تضيفيني .. ؟
يوسف : إنشالله الحين
جـــراح : أوكي آنا طالع الحين تامريني على شي .. ؟
يوسف : سلامتك
جـــراح : أشوفج على خير إنشالله .. مع السلامه
يوسف : الله يسلمك
فلم يوسف مشى على جراح المسكين
وجراح عاش بوهم
ويوسف ما تاب صار يسولف مع جراح كل يوم بالمسنجر
وطبعا يوسف للحين منتحر شخصية شيماء
وجراح المسكين عاش بأجواء الحب وتولع بشيماء
وطلب يشوف صورتها
والثعلب يوسف مضبط شغله
حط حق جراح صورة بنية حاطه شيله على راسها وهالبنيه حلوه وايد
وجراح لما شاف الصوره لا ليله ليل ولا نهاره نهار
خلاص إنفجر
الحب سيطر عليه من كل مكان
وصار ينفذ أوامر شيماء أقصد يوسف
وهالدقه اللي مسويها يوسف تتوقعون جم إستمرت .. ؟
ســـــنـــــة كـــــامـــــلـــــة
يوسف للأسف ما مل من هاللعبه
سبحان الله
جراح يبجي وما ينام الليل من كثر الشوق واللهفه والحنين اللي فيه
وينطر متى يصير باجر عشان يسولف ويا شيماء
أقصد الوهم
ويوسف الله يسامحه
ميت من الضحك عليه
يوسف قام يحلي اللعبه
صار ما يشبك
وطبعا جراح المسكين قام يحاتي ويدز إيميلات
ويوسف ميت ضحك
جراح صار واحد ثاني
ما يطلع من بيتهم
كلا قاعد بداره
يتخيل صورة شيومه حبيبته
يتخيل سوالفها
دلعها
روحها الحلوه
ويبجي ويبجي
بعد شهرين
شبك يوسف
وجراح طار من الفرحة
قال حق شيوم ليش ما تشبكين .. ؟ وشرحلها شوقه وحنينه
وقاموا يسولفون
جراح ما قدر يصبر
قال حق شيوم أبي رقمج بكلمج بالتلفون
شيوم إرفضت تدرون ليش .. ؟
لأن صوتها خشن
اللي أهو صوت يوسف هالتعبان اللي ما يستحي
فقررت شيوم إنها تواعد جراح
ودار بينهم هالحوار
جـــراح : حياتي يعني الحين شلون ماراح أسمع صوتج .. ؟
يوسف : حياتي لا تزعل روحك جذي .. أنا عندي فكرة
جـــراح : شنو .. ؟
يوسف : شرايك تشوفني .. وبجذي راح ناخذ على بعض أحسن من التلفون بألف مرة
جـــراح : من صجج إنتي .. ؟
يوسف : إي والله من صجي
جـــراح : الله وناااااااااااسة
يوسف : وآنا شبي غير وناستك يا بعد عمري
جـــراح : حياتي والله .. إنزين شيومتي أي مكان راح أشوفج فيه .. ؟
يوسف : ممم شوف الساعة 9 بليل بالحديقة شرايك
جـــراح : صار بس شنو راح تلبسين .. ؟
يوسف : ممم راح اكون لابسه شيله ونقاب وعبايه
جـــراح : وي وي وي ليش كل هالعذاب .. ؟
يوسف : حياتي عشان ما أبي احد يشوفني
جـــراح : أوكي حياتي صار
جراح طبعا ما يحتاي أوصفلكم شعوره
الأخ المسكين راح الصالون ما خلا شي ما سواه بويها
سنفرة وتنظيف بشرة وحلق وظبط شغله وكشخ
وراح الحديقه الساعه 5
ينطر الساعه تصير 9 عشان يشوفها
مسكين كل هذا حب .. ؟
قاعد ينطر وينطر
وأخونا الشيطون الثاني يويسف
رايح بازار فحيحيل يشتري دراعة وعباية وشيلة ونقاب
قرب الموعد
يوسف لبس الدراعة وتعطر من عطر حمامهم
ولبس الشيله والنقاب والعبايه
والأخ يعني صايد الحركة
راح كحل عينه هههههههههه
صارت الساعة 9 بليل
راح يويسف الحديقه وقعد بالكرسي
نزل جراح من السياره وغرق روحه بالعطر المسكين
دخل الحديقه وقام يدور على وحده منقبه وعبايه
لقاها قاعده آخر شي
قرب صوبها
وبدأت ساعة الصفر
طبعا يوسف ما خلا عسل ما شربه عشان ينعم الصوت هههههههههه
ومشت على جراح لعبة الصوت
لأنه منهمك بالحب ولا ركز على هالشغلات
ودار بينهم هالحوار
جـــراح : قوة
يوسف : قوتين يا هلا
جـــراح : إنتي شيوووم .. ؟
يوسف : إي آنا شنو ما عرفتني
جـــراح : لا أعرفج بس حبيت أتأكد
يوسف : والحين تأكدت .. ؟
جـــراح : إي بعد عمري تأكدت
يوسف : واااي على هالحجي الحلو
جـــراح : سمعيني شيوم آنا أموت فيج أحبج وااايد وااايد مستعد أذبح روحي عشانج
يوسف : بعد عمري لا تقول تذبح روحك .. سملة عليك
جـــراح : حياتي عفيه بكلمج بالتلفون
يوسف : آنا ودي أكلمك بس ماقدر ماقدر
جـــراح : ليش .. ؟
يوسف : تلفوني مافيه رصيد كلش
جـــراح : ههههه لا يا عمري آنا راح أتصل عليج مو إنتي
يوسف : حياتي إنتا ما تقدر تتصل علي لأن خطي مصفر مافيه ولا فلس وراح يطلعلك
(( لا يمكن الإتصال على المشترك حاليا ))
جـــراح : أوكي خلاص اليوم روحي إشتريلج كرت وعبي
يوسف : من وينلي فلوس .. ؟ أبوي ما يعطيني ولا أمي مادري شفيهم علي هالأيام
جـــراح : ولا يهمج حياتي دقايق بروح أشتريلج كرت وأرد
يوسف : لالا مابي أكلف عليك
جـــراح : لا عمري لا كلافة ولا شي و إنتي مني وفيني
راح جراح يشتري كرت حق شيوم
وطبعا الأخ الفاضل يويسف
رفع النقاب ويها عرق
قام يستنشق الهواء
وأهو ميت ضحك
شاف جراح ياي من بعيد
غطا ويها
وصل جراح
ودار بينهم هالحوار
جـــراح : هاج عمري هذا الكرت
يوسف : وي وي بعد عمري مشكور ما قصرت
جـــراح : أفا عليج جم شيومه عندي
يوسف ما قدر يستحمل
فصخ النقاب والشيله
وشوفوا شصار
جـــراح : يو يوس يوس يو يوسس يوسف .. ؟
يوسف : كاااااااااااااااااااااااااااااااك يالخرووووووووووووووووووووووووووووووف
شنو تتوقعون موقف جراح ..؟
من بعد القصة اللي عاشها والسنة اللي خذاها بالحب والشوق والحنين
لشيماء اللي إطلعت وهم
وهالحب الوهمي اللي بناه وفكر إنه يوصل للزواج
كان لعبة من رفيجه
جراح إنصدم وظل واقف بمكانه ما يتحرك
ريوله تهتز مو قادره تشيله لما طاح وأغمى عليه
يوسف خاف على جراح وشاله ووداه المستشفى
وللأسف جراح ياله إنهيار عصبي وصار مينون وبظل طول عمره بالمستشفى
ظاعت حياة جراح ظاعت
ولو كانت شيماء حقيقة جان شفتوا حياة جراح
أحلى حياة لأن هالولد نيته شريفة وحب من قلبه
ويوسف كثر ماكان يضحك على جراح
صار يبجي ويبجي ويبجي
وحلف إنه ما يسامح نفسه طول عمره
لاكن بعد شنو .......... ؟؟
لا تلعبون فيها مثل ما لعب فيها يوسف برفيجه جراح
|
العرض العادي
