اعترافاتي بأني شخص استغلالي .. وابي استغلكم

[سفيرالظلام]

حبيت اقول لكم عن شيى .. واعترفلكم عنه .. حاولت اكتم الحقيقه بس ماقدرت اكتمها بالمره
راح اعترف لكم واقولكم هاذا الحقيقه ... حتى لو كرهتوني عادي بس ماخلي شيى في قلبي مااااقدر

(( انا استغلالي الى ابعد حد .. استغلالي بمعنى الكلمة ))

واحب اقولكم اني ماجيت هالمنتدى الى علشان استغله واستغلكم .. اي استغلكم .. صحيح انا احب الجميع
بس هاذا الشيى مايمنع اني استغلكم وطمعان فيكم بعد
طمعان فيكم كلكم مافرق بين اخ واخت او مشرف او عضو .. عضو جديد او عضو قديم
المهم مصلحتي فوق الجميع

ابيكم بس تركزون معاي على هالكم كلمة الي راح اقولها .. علشان تعرفون شلون انا استغلالي وابي استغلكم

عن القسم الاسلامي .. وعن النغمات ومقاطع البلاتوث ... الي كلنا عايشين في غفله عن هاذا الامور

كل واحد منا عنده تلفون وفيه بلاتوث .. وياكثر النغمات والاغاني والمقاطع الي فيه
ولو تقوله يافلان .. ارسلي نغمه .. والله بدال النغمه الواحده يرسلك 50 نغمه وهو مستانس حيل

اللحين انت ارسلته مقطع اغاني .. وسمعه .. انت تتحمل ذنبه ... واذا ارسله حق شخص ثاني وهالثاني ارسله الى شخص ثالث ورابع وعاشر
الله ياكثر الي وصل لهم المقطع يمكن بلمأت .. كل هاذوله .. انت تتحمل ذنبهم .. عليك ذنب
الواحد يسعى الى عمل الخير .. واحنا نجيب الذنوب الى انفسنا .. الى متى راح نتم عايشين في غفله

العالم لا يدركون كبر حجم هاذا العمل .. ويستهينون فيه

يقولك يه طرش بس ياله طرش ... والله لو كل واحد فيهم يفكر بحجم الذنب الي راح يجيله .. انه مايرسل ولا نغمه ولا مقطع

والله ذيك الايام .. كنت ماقصر عن احد .. تبي سيدي اغاني خلاص اكتب الاغاني الي تبيها وانا انزلها لك على سيدي
تبي مقاطع بلاتوث ورنات .. افاا عليك بس .. انت تامر امر .. خذ سيدي فيه فوق الــ 1000 مقطع .. طب وختار
يه .. واذا ماعندك كمبيوتر خلاص تعال عندي بالبيت .. وانا راح انزلك على تلفونك

بعد ما الله نورلي طريق الهداية .. صرت كل ماروح الديوانيات والمجالس وبالدوام .. تكفى طرش لنا هالاغنية
كنت اقول لهم .. اسف .. شنو اطرش لكم .. علشان انت تسمعها وانا الي اتحمل الذنب
ارسلها لك .. وبعدها انت ترسلها الى شخص ثاني وثالث وعاشر وانا اتحمل ذنوبكم كلكم .. لا يبااا .. روح العب بعيد
البعض منهم .. خذ المسئله انها بخل مني .. مابي ارسل الى احد مقطع .. والبعض يفكروني امزح وكاعادتي احب اتغشمر
اخر شيى قمت بعمل للميموري الي في تلفوني فورمات ومسحت كل الي فيه .. علشان ما حد يطلب مني نغمه او مقطع

وفي مجموعه يقولونلي انت متناقض .. طيب انت فيك وفيك وفيك .. جاي اللحين تنصح .. اقول لهم صح فيني وفيني
بس الحمدلله ربي هداني .. وشوي شوي احاول اقلل من هاذا الشغلات

مثلت لهم هاذا المثال .. قلت لهم اعتبرو ان الذنوب الي عندي على شكل بزابيز ( حنفيات )
حنفيه تبع سماع الاغاني .. حنفيه تبع مقاطع البلاتوث .. حنفية تبع تأخير الصلاة عن وقتها .. وحنفيه ....... الخ
وكل حنفيه من هاذوله .. تنزل بدال الماي .. ذنوب
قلت لهم .. طيب ليش اخلي كل هاذا الحنفيات شغاله وتنزل ذنوب .. اسكر حنفية سماع الاغاني .. اكون كذا قللت من من ذنوبي
وشوي اسكر حنفية تاخير الصلاة عن وقتها .. وشوي اسكر شوي من حنفية البلاتوث الين ماسكرها كامل .. اهم شيى اقلل من نزيف الذنوب من حنفياتي


وابي منكم شغله ثانيه ........... ادري اني طولت عليكم واجد ... بس استحملوني جزاكم الله خير


ابي كل واحد منكم يشارك في القسم الاسلامي ولو بحرف .. هاذا الحرف راح يدخل موازينك

لي مثله إذا كنت انا سبب من الأسباب برد ولا بموضوع مثل هذا الموضوع .. شفتو شلون استغلكم

مايهمني من وين انتو او شنو جنسيتكم او شنو جنسكم ذكر او انثى
ولكني احرص لكم على الخير .. وأكيد احرص لنفسي

واللحين بيجيك احد الاعضاء بيقول ليش انا اكتب موضوع في القسم الاسلامي كل هاذا علشان سفير الظلام ..؟؟
ومن هاذا سفير الظلام ... ماتلاحضون انه طالع فيها حبتين .. ومسوي روحه مطوع عليناا ..؟؟

لا تفكرون راح يدخل في جيبي ( مخباي ) شيى اذا دليتك على هاذا العمل
هذه يا اخي لك إن شاء الله في موازينك ... ويا اخي انت وش خسران لو ربنا عز وجل كتب لي مثلك

ماقول لكم تعالو كتبو لنا في الفقه او في التفسير .. لا على الاقل لو تكتب لا إله إلا الله القى بها ربي
امانه عليكم اليست اثقل في الموازين من السموات والأرض .. تبخل على نفسك بكلمة .. ممكن تدخلك الجنة

وتبي خير زيااااده ...؟؟
أبشر ..

اللحين انت كتبت هاذا الجمله .. وجا واحد قراها وواحد جاء ورد .. شوف كم مرة تضاعفت لا إله إلا الله

ليه تبخلوا على نفسكم ... يا اخي اكتب وانسى .. والله احصى لك كل حرف .. إذا مالقيت خيره في الدنيا رايح تلقاه في الآخرة
وترى خير هالكلمة في الدنيا وفي الآخرة .. يا اخي .. اكتب لو حرف يشهد لك تقابل بيه الله عز وجل

البعض ما ادري هل هو صائم قائم .. بنى مسجد ولا حفظ كتاب الله
مستغني إنه يكتب في المنتدى الإسلامي او يمر.. واثق من عمله .. واثق من ثقل موازينه

على مين تبخل .. على نفسك .. ولا على الله ... والله إن اللي خلقك في غنى عني وعنك وعن الخلق
ابخل اليوم لو تحب.. والله ابوك وأمك لو انك تنام في حضنهم كل يوم ... بكره لو تطلبهم بس حسنه وحده رايحين يبخلون عليك

واشكر لكم قرائت موضوعي .. مع انه طويل بس ياله اهم شيى قدرت اوصل المضمون

[سفيرالظلام]

توقعت اشوف اقبال وردود على هاذا الموضوع

ياله ماعليه .. ربك كريم

حتى لو مافي رد .. بس في زياارات
يعني في ناس تقراء الموضوع

[فراشة الأمل]

كيف تقول سفير ظلام وأنت سفير النور بالله عليك

لا أستطيع أن أقول أو أجادل فى شىء سوى أنى سأقول
أنك محق تماما

جزاك الله كل خير
وجعلها من ميزان حسناتك
اللهم آمين

لاحرمناك يا اخى الفاضل

فى حفظ الله

[ماجد]

عزيزي سفير ( النور )
كم نحن بحاجة إلى مثل هذا الإستغلال
حروفك سهم خير يقتل بقايا ذنوب تكمن في القلب
ولكلماتك صدى في النفوس ..
وأخبرك أن نجاح المواضيع لا تمكن في كثرة الردود .. ولكن في حجم الموضوع ومدى روعته ..
وموضوعك هذا حقيقة نبراس لكل موضوع دوّن على عتبات منتدى الحوار
كم نحن بحاجة إلى مثل مواضيعك هذه ..
لك كل الشكر

ماجد .,.,